Fernando Blanco, portavoz de Economía do BNG. Jessica Barcala/AGN

Tal e como explicou o portavoz de Economía do BNG, Fernando Blanco, “a proposta do BNG define que modelo queremos cara ao futuro porque a autorregulación non funcionou”. “É importante que administración teña voz alí onde se deciden cuestións moi importantes para o país e as caixas o son”, engadiu o deputado nacionalista.

Na proposición non de lei o BNG propón a participación da Administración galega cun 20 por cento dos conselleiros na Asamblea Xeral”, o que non sería un caso único porque a comunidade de Valencia ten un 25 por cento, a de Madrid un 21 por cento e Andalucía tamén.

Esta medida, segundo aclara Blanco, “non significa dirixir as caixas no día a día, senón ter unha presenza que coordine accións para que aproveitando esas sinerxias poidamos ter tamén unha ferramenta para nos enfrontar á crise e para que o aforro dos galegos e galegas ten que estar ao servizo do país, das empresas e das familias”.

Comité de retribucións

Outra das modificacións máis significativas é a creación dun comité de retribucións “para que as retribucións dos directivos teñan transparencia” e estará formado por tres persoas, unha delas necesariamente un representante da Xunta con competencias en política financeira.

O outro dos comités que quere introducir o BNG é o de investimentos, “formado por tres persoas, unha tamén en representación da Xunta”. Até o de agora, na anterior lexislatura, xa existía a posibilidade de marcar investimentos ás caixas mediante a tramitación dunha lei e o que pretende o BNG con este comité “é que a Administración poida tamén impulsar as políticas que o Goberno quer levar adiante e contar así co respaldo financeiro das caixas”.

Sesión de control

O debate sobre as caixas de aforros trasladarase tamén á sesión de control ao Goberno do mércores, cando se produza o cara a cara entre o presidente da Xunta, Alberte Núñez Feixóo, e o portavoz parlamentario do BNG, Carlos Aymerich. Coincidirá co día en que o xefe do Executivo citou os líderes políticos da oposición para abordar esta cuestión e tratar de buscar un acordo de país.

Pola súa banda, o presidente do grupo socialista, Manuel Vázquez, interrogará o xefe do Executivo galego pola "coherencia do seu goberno", en relación ás actuacións ou declaracións, ao seu xuízo contraditorias, da Xunta.