Hai pouco máis dun ano comezaba unha segunda etapa de colaboración con A Nosa Terra a través deste blog. Facíao coa idea de aproveitar a miña asistencia á “Web 2.0 Expo” e ao curso-congreso "Sociedad Red" para comezar esta colección de notas públicas, sempre en torno á rede. Precisamente, naquel curso-congreso déronse os primeiros pasos para traer Personal Democracy Forum a Europa.

A intersección de tecnoloxía e política é un tema de crecente interese. O “ciclón” Obama situouno no centro de atención dos medios tras o seu triunfo electoral nos USA en 2009, o que animou a todas as forzas políticas do mundo a intentar imitalo.

Ademais, a continua e persistente perda de confianza no poder político xerou nun sector da sociedade a inquedanza por unha maior transparencia da “cousa pública”, a carón dunha evolución cara a unha democracia máis directa e participativa.

Os dous días do Forum foron intensos e cheos de presentacións de experiencias, así como de reflexións colectivas. A pregunta sobre se o modelo Obama é replicábel en Europa, mesturouse coas eternas dúbidas sobre a verdadeira vocación da Unión Europea, sempre cuestionada.

O Forum, na miña opinión, foi un rotundo éxito, non tanto pola numerosa afluencia de público e a calidade do programa, senón pola sensación de ter cumprido co seu obxecto: conectar persoas interesadas en mellorar os modelos de goberno actuais, e promover así a xeración de iniciativas e proxectos coma os presentados venres e sábado.

O británica Mysociety.org, a Sunlight Foundation estadounidense ou o australiano wikileaks.org son algúns exemplos sobre os que espero falar en próximos posts.

Porén, cunha perspectiva máis rexional, a mini sección de iniciativas españolas deixou en evidencia o estado de neno en cueiros dos proxectos a nivel do Estado.

O acabado de nacer portal Voota.es e o Partido de Internet, liderado por un emprendedor TIC de 25 anos e fundado este luns, foron as que máis chamaron a miña atención.

Ao longo das próximas semanas gustaríame adicarlles unha serie de notas a algúns dos proxectos exitosos do panorama mundial, e tamén a seguir a evolución dos españois.

E vós, como pensades que a tecnoloxía pode mellorar a política?

PS: política vén do termo grego politikós: “cidadán, civil, relativo á ordenación da cidade”. Eu refírome á política coma o goberno e xestión do ben común por parte da cidadanía, con ou sen políticos.