O músico Nani García, a compositoria Zeltia Montes, o director de orquestra  David Etheve e o director Ignacio Vilar, nunha xornada da gravación da música de Pradolongo

Zeltia Montes foi nomeada aos prestixiosos premios Hollywood Music in Media Awards na categoría de Mellor Compositor Novel polo tema principal da banda sonora da película Pradolongo dirixida por Ignacio Vilar e producida por Vía Láctea Filmes.



Os HMMA elixen tan só un reducido grupo de nomeados de entre miles de obras presentadas a concurso dende todo o mundo entre os meses de votacións –entre xuño e outubro de 2009.

Os cinco nomeados na categoría de Mellor Compositor Novel son:
 Leah Curtis - Southwest of Here (Original Motion Picture Soundtrack); 
Zain Effendi – Gagetown
; Amanda Lee Falkenberg - Forgotten Arabia
; Zeltia Montes – Pradolongo; e Shawn Clement - Universe of Possibliites

.
O evento principal terá lugar o xoves, 19 de novembro de 2009 ás 19:30 horas (hora local en Los Ángeles) no mundialmente coñecido Teatro Kodak.
 
Os premios Hollywood Music in Media Awards recoñecen e premian a música para medios visuais, o talento dos individuos responsábeis dela, e tanto a música comercial como a de artistas independentes de todo o mundo polas súas composicións e gravacións para todo tipo de formatos incluíndo cine, TV, videoxogos, anuncios, trailers e vídeos musicais.

Os HMMA son tamén a primeira cerimonia adicada á música que recoñece e premia a excelencia en supervisión musical.

O xurado dos galardóns está composto por visionarios da industria e inclúe supervisores musicais, responsábeis de librarías musicais, produtores, publicistas, xornalistas, artistas, representantes, editores e outros profesionais do entretemento.

Producida por Vía Láctea Filmes Pradolongo conta coa participación de TVG e coa axuda da Dirección Xeral de Creación e Difusión Cultural da Consellaría de Cultura e Deportes da Xunta de Galicia, da Axencia Audiovisual Galega e da Deputación de Ourense. Tamén contou coa colaboración da Secretaría Xeral de Comunicación Audiovisual, Turgalicia e da Secretaría Xeral de Política Lingüística.