Xosé Ramón Gómez Besteiro, presidente da Deputación. AGN

A xuíza Estela San José, a mesma que leva a causa por supostas irregularidades na adxudicación de obras no Concello de Castro de Rei, acabou sobre as 17h30 de recompilar información no edificio administrativo do Fogar de Santa María, onde teñen a sede o Instituto Lucense para o Desenvolvemento Económico e Social (Inludes) e o departamento de Vías e Obras.

Unha vez concluído este labor, a vicepresidenta segunda da Deputación de Lugo, Lara Méndez, e dous técnicos provinciais acompañaron a maxistrada para prestar declaración, pero non en calidade de retidos. O presidente da Deputación, Xosé Ramón Gómez Besteiro, confirmou en declaracións aos medios que non lle constaba “ningún tipo de detención”.

Segundo fontes provinciais, a xuíza solicitou información e documentación relacionada con concellos da provincia de diversa cor política e co departamento de Vías e Obras a partir do 2006, cando a Deputación de Lugo aínda estaba gobernada polo PP.

Desde as municipais do 2007, o ente provincial está dirixido por unha coalición entre PSdeG e BNG, de xeito que os socialistas xestionan a presidencia e a vicepresidencias segunda e os nacionalistas, a primeira e a terceira.

Dende que comezou ás 11h00 da mañá o rexistro nas dependencias administrativas do Fogar de Santa María, o presidente da Deputación provincial quixo deixar claro que está a ofrecer “a máxima colaboración” na investigación. Besteiro incluso suspendeu unha viaxe de traballo á Arxentina por esta causa.