Anxo Rei Ballesteros. X.C.

Un ano despois do pasamento de Anxo Rei Ballesteros a Asociación Cultural Barbantia réndelle unha homenaxe a este narrador e ensaísta excepcional da literatura galega contemporánea.

Durante os venres do mes de novembro o Museo Valle-Inclán da Pobra do Caramiñal acollerá unhas conferencias e actos culturais que xirarán ao redor da figura de Rei Ballesteros.

A primeira destas citas, prevista para o venres 6 de novembro, incluirá a conferencia de Carlos Fernández baixo o título O home que disparaba contra os reloxios ás 21h00 e a presentación do ensaio Urda e Mundo, de Carlos Fernández de Anxo Rei Ballesteros, XXI Premio Ánxel Fole-Fundación Caixa Galicia.

O venres 13 de novembro As 20h00 Dores Vilavedra ofrecerá Os apuntes para unha contextualización de Dos anxos e dos mortos na narrativa galega contemporánea e ás 20h30 presentarase a novela inédita de Rei Ballesteros A noite do moucho coa presenza de Vítor F. Freixanes, director de Galaxia. Este acto estará seguido da presntación do libro artesán titulado O resto é silencio, con texto de Anxo Rei Ballesteros e gravados de Manuel Teira, editado pola colección Bourel que dirixe Antonio Piñeiro.

O 20 de novembro, o dramaturgo, actor, dramaturgo e tradutor, Manuel Lorenzo, impartirá a conferencia Teatro como exploración ás 20h30 e proxectarase un documental sobre o homenaxeado feito polos alumnos do EIS d'A Pobra do Caramiñal. A xornada finalizará cun coloquio ao redor da obra e vida de Rei Ballesteros na que participarán Carlos Santiago, Manolo Castelao, Jorge Sacido, Alberto Sacido, Manuel Teira e Andrés Esteban.

O 27 de novembro a homenaxe péchase coa presentación ás 20h30 do V Anuario de Estatutos do Barbanza, nesta ocasión adicado ao socio co-fundador Anxo Rei Ballesteros; a presentación do ensaio de Anxo A. Rei Ballesteros A flor de boca e a entrega dos Premios Barbantia da Cultura 2009.