Concentración veciñal en apoio o alcalde de Castro de Rei e os edís detidos. Xosé Marra

Nunha rolda de prensa, que se celebrou na sede do PSOE de Lugo en Castro de Rei, explicou que o obxectivo da investigación que segue a titular do Xulgado de Instrución número 3 de Lugo, Estela San José, atende á "adxudicación de obras a empresas da zona e bisbarra, fundamentalmente do FEIL", das que defende a súa "legalidade", baseándose nos informes técnicos xurídicos.

Neste sentido, expuxo que se trata de nove proxectos e que "foron legalmente adxudicados a oito empresas", pero matizou que, como dúas delas renunciaron, ao final foron seis as empresas adxudicatarias.

En todo momento subliñou, malia o segredo sumarial, que "os expedientes que se tramitaron foron legais". Valiño mantivo que, "cos expedientes administrativos revisados no concello, se pode comprobar en todos os casos que se cumpriron escrupulosamente as esixencias legais".

“Nada irregular”

Neste punto, trouxo a colación as declaracións dos responsábeis públicos municipais do PP e do BNG que manifestaron "que non atopaban en ningunha acta da xunta de goberno nada que fora irregular", recordou o rexedor. En todos eles, constan os preceptivos informes técnicos e xurídicos "que avalan a legalidade das adxudicacións realizadas e garanten a transparencia e igualdade de trato a todas as empresas", recalcou o alcalde.

O rexedor de Castro, que pasou dúas noites nos calabozos da comisaria de Lugo, destacou en varias ocasións o feito de que saíra en liberdade sen fianza e afirmou que "non é unha cuestión menor" á espera de que á vista do informe do fiscal se formule ou non algún tipo de acusación. "Ningún dos que comparecemos somos coñecedores dos cargos que se nos imputan e isto o quería deixar claro", reiterou.