Pablo Crespo, en prisión pola trama Gürtel, nun mitin detrás de Fraga. Andrés Panaro / ANT O sumario recolle que a trama corrupta organizou (e cobrou parte do custe en negro) as campañas dos conservadores galegos até, polo menos, 2003. A documentación tamén proba que houbo pagamentos en 'B' a directivos do PP galego en 2005.

Este xoves a Sala Civil e Penal do Tribunal Superior de Xustiza de Madrid (TSJM) rexeitou decretar a posta en liberdade provisional do ex secretario de organización do PP galego Pablo Crespo, o 'segundo' na trama 'Gürtel', pola gravidade dos delitos que se lle imputan.

Nun auto, o xuíz acorda desestimar o recurso de apelación interposto polo seu defensa contra o auto no que o pasado 28 de agosto o xuíz Antonio Pedreira denegou a súa posta en liberdade.

A Sala esgrime que as figuras delituosas recollidas na imputación, a confluencia nos delitos dun grupo de persoas, a continuidade delituosa e as penas ás que, segundo o Código Penal, podería chegar a ter que facer fronte Crespo "xustifican o mantemento da medida cautelar de privación de liberdade nos termos expresados".

O xuíz impútalle a Crespo os delitos de branqueo de diñeiro, fraude fiscal, tráfico de influencias, suborno, falsidade en documento público, oficial e mercantil, revelación de segredos e prevaricación.

Blanco Balín e Antoine Sánchez

O pasado martes, o xuíz acordou deixar en liberdade provisional baixo fianza de 600.000 euros ao curmán de Francisco Correa, Antoine Sánchez. Estimou que, no estado actual da causa, resulta procedente "a adopción de medidas menos gravosas para o dereito de liberdade".

Antoine era peza clave na estratexia que montara Correa para desvincularse das sociedades xestionadas desde o despacho de Ramón Blanco Balín, ex vicepresidente de Repsol. Segundo o sumario, o líder da trama quería apartarse con motivo das investigacións que iniciara a Fiscalía Anticorrupción nas oficinas de Blanco Balín.

Así, o curmán de Correa era titular dunha porcentaxe de capital das sociedades patrimoniais domiciliadas en España dividido en accións e titular das accións ao portador das sociedades situadas en paraísos fiscais ou territorios non cooperantes. Todo isto, co obxectivo de que fose o responsábel das sociedades cara ao exterior para desvincular a Correa de todas as actuacións.