Aguía morta polos muíños da Serra do Suído, autorizados polo PP en Rede Natura. Asemblea do Suído

A Xunta do PP aprobou a proposta de “Lei pola que se regula o aproveitamento eólico en Galiza e se crea o canon eólico e o fondo de compensación ambiental”. Cando a aprobe a maioría conservadora no Parlamento, a Lei servirá para derrogar o decreto do bipartito, que por vez primeira permitía que até o 14 por cento das accións dos muíños ficasen no público.

A recualificacións do solo será máis doada

O novo Goberno di que o sector non está parado por esta polémica derrogación. O conselleiro de Economía, Xavier Guerra, mesmo dá uns prazos (concesións definitivas a mediados de 2011 e entrada en funcionamento en 2012) que son lixeiramente máis curtos que os da anterior Administración.

Como logrará o PP evitar o atraso? Eliminando nalgúns casos o proxecto sectorial, a documentación que teñen que presentar as concesionarias eólicas para lograr a recualificación do solo. Se os muíños están en solo forestal (como é na maioría dos casos) abondará cunha licencia municipal, adiantou hoxe a Xunta.

Guerra presume de que así se acurta a tramitación até 12 meses. En todo caso, as concesionarias seguirán tendo que presentar o habitual estudo de impacto ambiental ante a Xunta. Trátase dun informe completo, sometido a alegacións públicas, que a administración supervisa, pero son as propias operadoras as que lles pagan aos técnicos que os elaboran.

Iso si, algunhas empresas aforraranse ter que presentar unha das memorias de avaliación ambiental obrigatoria na maioría dos casos até hoxe, pos son parte do proxecto sectorial que xa non será necesario coa nova Lei.

Polo demais, poucas novidades achegaron este mediodía os conservadores sobre a polémica derrogación. O máis relevante é que o proxecto de Lei leva, segundo o Goberno, o visto de bo de “expertos da máxima independencia” de tres universidades.

O Goberno exhibe o aval de catedráticos galegos e de fóra

Só unha delas é galega, a USC. As outras son madrileñas, a Complutense e a Carlos III. A Xunta subliña que ten o apoio do catedrático de Dereito Financeiro e Tributario da Universidade de Santiago de Compostela, César García Novoa; do catedrático de Dereito Financeiro e Tributario da Universidade Carlos III, Juan Zornoza Pérez; o catedrático de Dereito Administrativo da Universidade Complutense, Rafael Gómez-Ferrer Morant, e o catedrático de Dereito Administrativo da Universidade Complutense, Santiago Muñoz Machado.

“O catedrático de Enxeñería Química da Escola Técnica Superior de Enxeñería Juan José Casares Long, e o catedrático de Ciencias do Solo da Facultade de Bioloxía Felipe Macías Vázquez, ambos pertencentes á Universidade de Santiago de Compostela, elaboraron un informe sobre os impactos ambientais dos parques eólicos sobre os solos, as augas, as persoas e a súa calidade de vida”, indica ademais o Goberno.