Entre as partidas do 2010, Vázquez salientou o incremento en comedores escolares de "4,5 millóns de euros", que supón un 25 por cento máis respecto a 2009 nos xestionados directamente pola consellaría, e un "aumento do 10 por cento" naqueles xestionados por ANPAS, que permitirá "aumentar en 3.000 o número de comensais no 2010". En transporte escolar, destinará o 5,4 por cento do presuposto de Educación, con máis de 126,6 millóns de euros no 2010 -superior a Catalunya, Madrid ou Euskadi- e do que se beneficiarán 93.000 alumnos.

Ademais, incidiu no "incremento do 3,3 por cento" na partida de obras e reparacións en centros educativos -uns 46,6 millóns máis-; un incremento de "máis de 435.000 euros" en gastos de funcionamento; "perto de 10 millóns de euros" para potenciar a formación nas TIC do profesorado e dotar de equipos; e defendeu que as contas "potencian" a formación profesional, para permitir a incorporación ao mercado laboral de "42.000 novos profesionais".

No caso do ensino universitario, defendeu que "só terán unha redución duns 10 millóns" -recibirá máis de 393 millóns de euros- ; e beneficiarase dun "importe total de 64 millóns" para fortalecer a investigación -con achegas de Educación e outras consellarías-.

No ensino de linguas, destacou os "máis de catro millóns" para axudas a "miles de estudantes galegos" que desexen estudar no estranxeiro; a creación dunha Rede Local de Dinamización Lingüística -cun millón de euros- "máis de catro millóns" en programas de dinamización do galego en diferentes ámbitos; ou "unha partida de 1,2 millóns de euros" para garantir a súa proxección exterior. "-Pretendemos dar- unha visión amábel, moderna e útil do galego," asegurou.

Finalmente, incidiu no "aforro" en gastos de persoal, que supuxo "o 42 por cento" no caso do cadro de gabinete que "alcanza o 75 por cento" na Secretaría Xeral de Política Lingüística.

Respecto a estas partidas, Meixón acusou á Xunta de impoñerlle ás familias mileuristas "un imposto revolucionario", ao eliminar o sistema de "gratuidade total" en libros de texto e "incrementar" o custo en comedores escolares, e ironizou con que o aumento nesta partida "sexa xusto -a cantidade- que se encontrou de burato" no departamento autonómico.

Así, criticou a redución "en máis de 20 millóns" do presuposto do departamento autonómico de Educación e afirmou que "as boas noticias" neste ámbito "chegan do Goberno central", ademais de lamentar que "o sistema público non lle interese demasiado ao PP" ao considerar que se aumentou a partida destinada a centros educativos concertados.

Neste sentido, Carme Adán lamentou "un aumento de 1,5 millóns para concertación" mentres se destinan "menos prazas" en comedores cun "aumento de custos para as familias".