Manifestación de 'Queremos Galego' a prol do galego. Paco Vilabarros

O PSdeG declarou o seu apoio oficial á manifestación de ‘Queremos galego’ o 18 de outubro en Santiago de Compostela. Outro tanto fixeron o Partido Galeguista, Coalición Galega e Terra Galega. En tanto que BNG, Esquerda Unida e FPG forman parte da Plataforma, só o PP está á marxe desta mobilización, aínda que algúns dos seus máis destacados militantes asistirán ao acto en defensa da lingua.

O portavoz de Lingua do Grupo parlamentario socialista, Francisco Cerviño, manifestou nunha entrevista con A Nosa Terra Diario que nestes momentos “a presión na rúa é necesaria” para tentar “frear a política agresiva de Núñez Feixóo” con respecto ao idioma propio. Malia que o PSdeG estará o 18 de outubro en Compostela, polo de agora non se vai sumar a ‘Queremos Galego’. En principio, os socialistas son partidarios de que se produza unha coordinación entre as distintas plataformas en defensa da lingua.

Coa suma do PSdeG á manifestación, só o PP permanece á marxe desta convocatoria, aínda que algúns destacados militantes populares ou ben amosaron a súa intención de acudir ao acto ou ben deron os seus parabén a quen o fixese.

O Partido Galeguista (PG), Coalición Galega (CG) e Terra Galega (TeGa) son outras forzas que asistirán ademais do BNG –que está integrado en ‘Queremos galego’ con Esquerda Unida e FPG. PG e CG confirmaron a súa asistencia a través dunha comunicación oficial no que tamén daban conta do inicio de conversas para a unificación dos dous partidos.

"Censura escandalosa"

O portavoz de Lingua do BNG, Bieito Lobeira, denunciou nestas páxinas a “censura escandalosa” que está a sufrir a manifestación nos medios. Dende o seu punto de vista, nestes días previos se están a “ocultar as actividades dunha plataforma que é a maior expresión en defensa do galego da historia”, xa que segundo lembrou están adheridas a 'Queremos Galego' máis de 500 entidades e colectivos. O deputado chama á mobilización masiva da sociedade para obrigar o PP a que desista da súa política desgaleguizadora.