Bieito Lobeira, deputado do BNG. AGN

Por que considera necesario o BNG unha manifestación en defensa do galego nestes momentos?

Como nacionalistas que somos, temos o deber de defender o noso. E unha das razóns de ser do pobo galego é a lingua. Se non defendemos o idioma na práctica coa mobilización da cidadanía ninguén o vai facer por nós. Ademais, este contexto de agresión á lingua por parte do PP esixe trasladar á rúa o que se nos nega no Parlamento e nas demais institucións. Xa historicamente, a defensa da lingua foi unha das potencialidades do pobo galego. Así que, se este proceso que se vai iniciar o 18 de outubro é quen de poñer en pé a cidadanía, o PP vaino ter difícil.

Dende o seu punto de vista, cal é a situación da lingua?

É unha situación preocupantes porque está perdendo falantes desde hai anos. Ademais, a maioría dos medios van nesa dirección. A meirande parte dos medios están a censurar a información previa á manifestación do día 18. Ocultan as actividades dunha plataforma que é a maior expresión en defensa do galego da historia. Hoxe en día, xa están adheridas a “Queremos Galego” máis de 500 entidades e colectivos, máis as adhesións individuais.

E a que responde esta censura?

Os medios reciben millóns de euros por fomentar o galego. Con todo, son utilizados polo poder como correa de transmisión para combater a lingua.

Cales son as propostas do BNG para facerlle fronte a esta situación?

A curto prazo, o BNG ten que obrigar o Goberno a cumprir a legalidade vixente –que é cativa– para non dar pasos cara a atrás. Tamén estamos implicados na popularización da Iniciativa Lexislativa Popular (ILP) que “Queremos Galego” está a pór en marcha. Á marxe da dialéctica política cómpre potenciar masivamente a mobilización social en dous sentidos, concienciándoa lingüisticamente e instándoa a actuar para obrigar o Goberno a que desista da súa actitude desgaleguizadora.

Como membro da comisión xestora de “Queremos Galego”, cales son as súas expectativas de cara á manifestación do 18 de outubro?

Penso que vai ser un éxito, vai ser masiva. Así o demostran as cifras que manexamos do transporte colectivo. Mesmo confirmaron a súa presenza persoas do Bierzo. Malia esta censura escandalosa que sufrimos, a sociedade galega está a responder e está a demostrar a defensa do seu. Cada día súmase máis xente á “Queremos Galego”. O día 18 non vai ser a meta, senón o inicio dun proceso. Se non somos quen de frear o PP, os efectos sobre o idioma van ser devastadores, pero teño confianza en que imos gañar esta batalla porque a meirande parte da cidadanía, fale ou non o galego, defende a lingua.