Anxo Louzao. AGN

Por que decide a CIG adherirse a “Queremos Galego”?

Desde o primeiro momento, compartimos os obxectivos da plataforma, que naceu nun momento caracterizado polo grave ataque do PP á lingua. Decidimos unir todos os esforzos para confluír nunha entidade coa que actuar contra as propostas e medidas do PP, que está a seguir unha política desgaleguizadora cunha meta clara, a eliminación do galego.

Como valora a política da Xunta en materia lingüística?

É máis que nefasta. A loita que mantén este Goberno contra o idioma non deixa de ser inaudita. Trátase dunha actitude sen precedentes, obsesiva en contra do galego e que persegue todos os pequenos avances que se deran até o de agora no campo da normalización lingüística. Malia ser o idioma propio do país, o galego é proscrito, marxinado e carece dos dereitos cos que conta o castelán. O PP alimenta esta situación porque lle ten unha fobia e unha aversión total á lingua e deste xeito trata de que cada vez teña menos usos e que sexa menos útil.

En que se materializa esa aversión da que fala?

En menos de seis meses, o PP modificou a Lei da Función Pública –co que non garante o uso do noso idioma na Administración– e eliminou do decreto de Educación Infantil a referencia ao propio decreto que regula o uso e promoción da lingua no ensino para evitar que se impartise o 50 por cento das materias en galego nos ámbitos castelanfalantes. A Xunta do PP acaba tamén de eliminar as axudas aos programas de inmersión lingüística en ámbitos castelanfalantes en Infantil e modificou á baixa os premios para a innovación e a normalización no eido educativo. Acabamos de coñecer tamén que o Goberno atrasa as axudas á normalización e nuns meses, coñeceremos o novo decreto que substituirá o 124/2007.

Militantes do PPdeG móstranse en desacordo coa política lingüística que está a seguir o partido. Que lle parece?

O deseño da política lingüística do PP emana dunha visión de extrema dereita, ultraliberal e de destruír todo o que é plural. O PPdeG está a seguir o marco ideolóxico da FAES. Existen sectores minoritarios dentro do partido que non ven con bos ollos estas actuacións e neste sentido paréceme moi ben. Non obstante, gustaríame que ese sector se rebelase para tratar de frear a política de agresión. Pero non só o PP ataca o galego. Hai amplos sectores dentro do PsdeG que participan desta liña lingüística. Puidémolo comprobar coa polémica do topónimo de A Coruña. O propio secretario xeral do partido, Manuel Vázquez, e parte da Corporación actual no concello mostráronse a favor da cooficialidade de “La Coruña”.