'A xuíza Amy' O presidente de APRADOGA (Asociación de Profesionais da Rama Artística da Dobraxe de Galicia), Xosé A. Rubal, mostrouse "desconcertado" pola política que está a levar a cabo a TVG en materia de dobraxe. Na actualidade G2, a segunda canle da televisión pública, está a emitir en inglés con subtítulos en galego o programa infantil Teletubbies, que xa se emitiu dobrado, e a serie americana A xuíza Amy, esta sen subtítulos. Esta política, como apunta APRADOGA, contradí o artigo primeiro da lei da fundación da TVG, que obriga a canle pública a emitir todos os seus produtos en galego atendendo o compromiso na defensa dos valores da cultura e do idiomas galegos.

Con respecto aos Teletubbies, o presidente de APRADOGA pregúntase como un espazo dirixido a nenos de entre 0 e 4 anos, que non saben ler, opta polo sistema de subtítulos. "É unha decisión que non ten precedentes en ningunha canle española", sinala. Como el mesmo explica, pedagogos defenden que a mellor maneira de achegarse a un idioma que non é o propio é mediante a supervisión dun pedagogo e non directamente como pretende facer a TVG.

A TVG avanzou ademais que en novembro emitirá en G2, tamén en inglés con subtítulos, a serie Dawson Creek, dirixida ao público infantil e xuvenil.

APRADOGA móstrase prudente á hora de facer unha análise das motivacións que se agachan detrás destas decisións até que se reúna o próximo 16 de outubro cos directivos de programación allea da TVG, pero ve nelas unha intención de recorte das inversións en dobraxe e unha compoñente ideolóxica "que nos fai cuestionar até que punto están implicados na defensa do galego".