Pablo Crespo, en prisión pola trama Gürtel, nun mitin detrás de Fraga. Andrés Panaro / ANT

A información procede dunha conversa intervida no cárcere a Pablo Crespo, número tres do PPdeG entre 1996 e 1999. Nela Crespo, ex-vogal de Portos de Galicia até 2005, admite ter remitido unha carta a Manuel Fraga na que lle dá conta da súa xestión contábel do partido.

Crespo tamén se mostra preocupado nunha conversa co seu avogado pola caixa de seguridade nunha entidade de Pontevedra. Nela, ocultaba os documentos do financiamento ilegal do PP até 1999.

A Policía finalmente atopou a caixa e no informe correspondente os axentes indicam que os conservadores pagaban en negro a metade dos seus gastos electorais (máis de tres millóns de euros) realizados por empresas do tamén preso Francisco Correa.O avogado de Crespo infórmalle que eses delitos poderían non estar prescritos, ao ser unha infracción electoral que prescribe aos dez anos.

O feito de que Fraga (senador por designación do Parlamento de Galicia e presidente de honra do PPdeG) estivera ao tanto das irregularidades e que o delito non estea prescrito podería desmontar definitivamente o principal argumento da actual dirección do PP.

Alberte Núñez Feixóo ten presumido que non hai Gürtel en Galiza pois ningún dirixente actual dos conservadores estaba ao tanto dos presuntos delitos.

O sumario tamén mostra que as empresas da trama de Crespo e Correa traballaron para o PP estatal até 2005. Até ese ano Crespo foi vogal de Portos de Galicia, baixo a presidencia de Carlos Negreira (líder do PP da Coruña). Nese periodo Portos adxudicou varios contratos a Constructora Hispánica, sociedade tamén imputada por tráfico de influencias, nos que o Consello de Contas atopou graves irregularidades.