A escritora Mercedes Queixas. AELG

Por que decide adherirse ás plataformas en defensa da lingua?

Non é nada novo nin puntual, xa que vén de anos atrás. Participo desde hai tempo, na medida do posíbel, en calquera asociación, agrupación ou movemento de renovación pedagóxica que trate de restaurar a normalidade de usos para a lingua. No devir, desde o meu compromiso e implicación, tentarei estar presente nas iniciativas que promovan o uso e a defensa do galego.

Como ve a situación actual do galego?

Con preocupación tanto como nai, como cidadá e como docente. Preocúpame o discurso político que xa se foi concretando en medidas que frearon os pequenos avances dos últimos anos e preocúpanme as actitudes de certas minorías respecto ao noso idioma. Eu adoito reparar na evolución do coñecemento e do dominio da lingua en relación á sociedade e mesmo ás xeracións da miña familia. Hai anos cheguei a constatar certa mellora, porque eu acadei máis competencias no galego que calquera das xeracións da miña casa e mesmo conseguín estabelecer unha relación especial coa lingua.

Di que se preocupa pola lingua “como nai”...

Gustaríame que as miñas fillas puidesen vivir en galego con certa normalidade, sen prexuízos e sen que sectores da sociedade as fagan sentirse menos polo feito de falar en galego. Sería bo que as xeracións novas non só coñecesen o noso idioma, senón que presentisen que a sociedade non llo impedise falar. Hoxe en día vemos como a nosa lingua non se transmite na rúa. Os rapaces e rapazas galegofalantes poden presentir que o galego pode ser algo menos que o castelán porque non o ven nin o escoitan. O certo é que ven poucos elementos de positividade e de normalización da lingua.

Por que cre que xorden arestora as plataformas en defensa do galego?

Nacen para canalizar sentimentos encontrados, que se levan sufrindo desde hai tempo. No último ano e medio, a sociedade volveuse máis adurmiñada porque as cousas ían cara a adiante, pero desde hai pouco alguén se encargou entón de crispar con argumentos falaces unha defensa falsa do bilingüismo, que non é tal, senón que trata de invisibilizar o galego. Tratan de minorizar a lingua propia de todos os galegos e galegas –aínda que a este sector non lle moleste– porque o galego é o noso idioma propio, tal e como recolle o marco legal.