Pablo Crespo, ex-número 3 do PPdeG e vogal de Portos até 2005

Un informe da Brigada de Branqueo da Policía detalla como o Partido Popular de Galicia pagou 3.224.826 euros en diñeiro negro, entre abril de 1996 e setembro de 1999, a diferentes provedores que lle organizaron todo tipo de eventos.

Os axentes contan con documentos procedentes dunha caixa de seguridade do Banco de Santander en Pontevedra. Segundo revela o diario Público hoxe, os papeis mostran a contabilidade dos actos conservadores entre 1996 e 1999. A metade pagouse a empresas da trama Gürtel en diñeiro negro.

Porque Feixóo mantivo a Crespo no cargo malia as sospeitas?

A caixa pertence a Pablo Crespo, hoxe en prisión como número dous da trama. Crespo foi número 3 do PPdeG en 1999, deputado e vogal de Portos de Galicia até 2005.

Alberto Núñez Feixóo, como Conselleiro de Política Territorial, mantivo a Crespo como directivo de Portos de Galicia malia que no PPdeG xa se deixara de traballar con el nos actos electorais, ante as sospeitas de que podería estar detrás dun intento de chantaxe a Mariano Raxoi cunha gravación sobre a vellez de Fraga.

Da etapa de Crespo como vogal de Portos chama a atención o gran número de adxudicacións a empresas hoxe imputadas no Gürtel polo pago de comisións. Especialmente dous contratos a dedo a Constructora Hispánica en 2004 nos que o Consello de Contas atopou graves irregularidades, malia que o PP insiste en que os auditores públicos non viron 'actos de responsabilidade fiscal'.

Tamén pagaron en negro as galegas de 1997

Sobre o financiamento ilegal do PPdeG entre 1996 e 1999, a Policía atopou pagos pendentes a dúas empresas xa coñecidas da trama (FCS e Special Events) e unha axencia de publicidade até hoxe descoñecida A-Uno Asociados. Os pagos en negro alcanzan as municipais de 1999 pero tamén as galegas de 1997, as terceiras que gañou Manuel Fraga.

O PPdeG teima en negar as probas de financiamento ilegal e asegura que as informacións sobre o 'Gürtel' en Galicia son un intento de importar “presuntos escándalos doutras latitudes” por parte da oposición.

O PP insiste en que é un 'suposto escándalo' importado

Onte PSdeG volveu a insistir en que Carlos Negreira (presidente de Portos cando Crespo era vogal e hoxe líder dos conservadores na Coruña), Rafael Louzán (quen presuntamente contratou a unha empresa da trama e líder do PP en Pontevedra) e o propio Núñez Feixóo deben dar explicacións no Parlamento.

O presidente do PP galego naquela época era Manuel Fraga e como número tres do partido na súa calidade de secretario de Organización figuraba Pablo Crespo, agora en prisión acusado de ser un dos xefe da trama Gürtel. A cúpula completábaa o secretario xeral, José Cuiña, falecido en 2007 e implicado en múltiples escándalos durante a súa traxectoria política.