Entre os asinantes de “ProLingua” hai militantes do PP como Rafael Cuíña.

En “ProLingua” buscamos que se visualice a defensa do galego con independencia do partido en que milite cadaquén. Esperemos que o feito de se manifestaren a prol do galego non sexa motivo de represalia e ostracismo por parte de ninguén. Somos máis os que dun ou doutro xeito defendemos o galego –independentemente do idioma que un fale– que os que se afanan en que desapareza ou en que se vexa como algo folclórico. Puidémolo ver comparando na que se atacou o galego –onde participaron unhas 3.000 persoas– coa manifestación na que se defendeu –onde participamos unhas 30.000–. Se o Goberno non o quere ver... O que si teño claro é que non teñen convencidos a todos os que eles pensan que teñen convencidos.

Como ve a política lingüística que está a desenvolver a Xunta?

Cando teñen a máis mínima oportunidade, atacan a lingua. Á mínima buscan un motivo para quitarlle ao galego os poucos dereitos cos que conta. A modificación da Lei da Función Pública, a derrogación do decreto que regula o uso e promoción do galego no ensino, o castelán na Administración... e nos últimos días regresan co debate da toponimia da Coruña. Esta situación require accións e respostas. Cómpre cargármonos de optimismo e decatarnos de que podemos, porque somos máis, temos razón e non mentimos.

Como é a convivencia entre as distintas plataformas creadas para promover o galego?

Persoalmente, vexo as outras plataformas como irmás e mesmo formo parte delas. Paréceme ben que se creen outros colectivos que coinciden coa defensa da lingua, así cada galego poderá atopar o lugar no que se sinta máis cómodo. Nós non competimos, nin replicamos nin repetimos o de ninguén.

Entón, garante a unidade entre as distintas entidades.

A unidade en defensa do galego está absolutamente garantida. Eu vou participar sempre nos actos de defensa da lingua independentemente de quen os convoque. O día 18 estarei na manifestación organizada por “Queremos Galego”. Por outra banda, nunca vou promover nada que poida resultar un atranco para outra plataforma en defensa da lingua.

No manifesto da plataforma, sinalan que “nunca se sumará como “ProLingua” a ningunha acción allea”. A que se debe?

Autoexcluímonos como colectivo de participar en accións non promovidas por nós para que todo o mundo poida sentirse cómodo e actuar conforme queira cadaquén.