Manifestación a prol da lingua. AGN

Os representantes das distintas entidades artelladas nos últimos tempos en defensa do galego como resposta á política lingüística que está a desenvolver o Goberno do PP confirman o seu apoio á manifestación convocada pola plataforma “Queremos Galego” para o 18 de outubro ás 12 horas na Alameda de Compostela.

Cambia Galicia

Desde “Cambia Galicia” –que non funciona a xeito de plataforma– sinalan que se manteñen en contacto “con outros colectivos, como ProLingua e Queremos Galego” e aseguran que “a nivel individual –nós non nos movemos como grupo– cómpre reforzar todo o que se faga en defensa do galego”, como a manifestación do próximo día 18.

O colectivo explica que “o traballo que desenvolvemos é diferente ao das outras entidades, nós traballamos nunha caste de laboratorio de ideas para cambiar a mentalidade da sociedade. Trátase dun traballo de sensibilización a longo prazo”.

Galego. Patrimonio da Humanidade

Manuel Bragado, un dos impulsores do manifesto “Galego. Patrimonio da Humanidade”, que xa recadou máis de 2.000 adhesións, anima os galegos e galegas a asistir á marcha convocada por “Queremos Galego”. “Nós non nos movemos como grupo, creamos o manifesto, pero hoxe en día xurdiron novas iniciativas que hai que apoiar”, explica Bragado, que subliña a importancia de que cada vez “haxa máis plataformas cívicas de apoio á lingua” e de que “teñamos un espazo de encontro o máis amplo posíbel”.

Nesta liña, o director de Xerais chama a sociedade “a apoiar a manifestación como calquera outra iniciativa a prol do galego”.

ProLingua

Á manifestación do próximo 18 de outubro tamén asistirán os promotores de “ProLigua”, “plataforma creada por persoas de moi diversa ideoloxía e profesión que ten como obxectivos exclusivos a promoción do galego como lingua propia de Galiza (e das comarcas estremeiras) e a consecución da súa oficialidade real”.

Malia que a entidade proclama no seu manifesto que “nunca se sumará como ProLingua a ningunha acción allea”, representantes do colectivo –que se constituirá o  sábado 3 de outubro na facultade de Filoloxía da Universidade de Santiago de Compostela ás 11h30– promoven a asistencia á marcha de “Queremos Galego”. “Moitos de nós estamos en toda canta iniciativa xorde a favor da lingua”, explica un dos impulsores, que di estar facendo “campaña a favor da manifestación”.