Henrique Viéitez, deputado do BNG, en rolda de prensa. AGN

Ante este déficit, o deputado Henrique Viéitez acaba de presentar dúas interpelacións, unha escrita e outra oral, no Parlamento. En particular, o parlamentar do BNG pregúntalle á Consellaría de Economía polos convenios cos medios de comunicación. Viétez esíxelle a Consellaría de Economía que detalle as cantidades e obxectivos de cada acordo.

O Consello de Contas atopou 14 millóns entregados a dedo en 2004

Cómpre lembrar que o último informe do Consello de Contas alertou da enorme cantidade de cartos públicos que reciben os empresarios de medios de comunicación a través dos convenios. Os fiscais públicos descubriron que se entregaran 14 millóns por esta vía en 2004, o último ano completo da era de Manuel Fraga. O maior beneficiario foi o grupo de La Voz de Galicia, con 1,8 millóns; tamén beneficiado do único convenio asinado por Augas de Galicia co novo Goberno, acordo do que non se publicou a cuantía.

A diferenza das axudas polo uso do galego publicadas no DOG, nos convenios non hai bases ou concurso público. Fican, polo tanto, a discreción de cada conselleiro ou mandatario. O Colexio e o Sindicato de Xornalistas teñen denunciado que esta práctica, que se mantivo durante o bipartito, serve para controlar a información.

O bipartito obrigou a publicar os convenios, pero a nova Administración non o fai

A mellora introducida polo bipartito foi a obriga de publicar os convenios de certo importe. Ademais de no DOG, a Lei de Transparencia estabelece que se deben colgar na web institucional. Así sucedía no portal da Vicepresidencia, que publicaba os convenios nunha base de datos pública.

Desaparecida a Vicepresidencia co novo Goberno, ningunha das consellarías que asumiron as súas competencias encargouse de manter en liña a base de datos. Os convenios das novas consellarías do PP están a día de hoxe vedados á opinión pública. Por exemplo, a web de Economía segue a publicar unicamente os asinados polo anterior Executivo.