Alberte Núñez Feixóo e Salvador Gabarró no Consello de Administración de Gas Natural. AGN Gas Natural celebrou onte na Coruña, na sede da sociedade en Galiza, a primeira reunión do seu consello de administración tras a recente formalización da fusión con Unión Fenosa. No encontro, Gabarró cualificou de "interesantes" os proxectos en biomasa de Gas Natural en Galiza, mentres que asegurou que na nova distribución eólica deseñada pola Xunta intentarán "xogar" as súas "bazas".

"Imos intentar coller o que poidamos, xa o intentamos a primeira vez sen moita sorte", recordou, en alusión ao concurso convocado polo bipartito. Preguntado sobre o canon eólico, o presidente de Gas Natural asegurou que "ten sentido".

"Entendo que un país que contribúe a xerar unha enerxía que pode ir a calquera parte do Estado ten certo dereito a percibir unha remuneración", engadiu Gabarró, quen incidiu, non obstante, en buscar "o punto de equilibrio" en canto á contía.

Compromiso con Galiza

O presidente de Gas Natural salientou o "compromiso" da compañía con Galiza, tanto no negocio gasista e eléctrico como no ámbito institucional e cultural ao finalizar unha reunión que a compañía celebrou na Coruña.

"Somos conscientes de que somos os líderes enerxéticos en Galiza e todo líder ten que ter compromisos", indicou Gabarró, que durante o consello de administración lle explicou ao titular do Executivo galego, Alberte Núñez Feixóo, a aposta da compañía polos proxectos de xeración de enerxía a través das renovábeis (hidráulica, eólica e biomasa) coa finalidade de aumentar a produción de electricidade mediante enerxías autóctonas e diminuír a dependencia enerxética de Galiza.

O presidente de Gas Natural sinalou que centrarán os seus esforzos en mellorar a calidade dos servizos eléctricos e de gas en Galiza, "que xa son bos", matizou, e en acometer investimentos para impulsar a produción enerxética, de xeito "ecolóxico".

Ciclo combinado

Por outra banda, o presidente de Gas Natural non descartou o mantemento do ciclo combinado de Sabón, na Coruña. Ao respecto, insistiu en que a intención do grupo é "preservar ao máximo os investimentos en Galiza, que igual son todas,", puntualizou a preguntas dos xornalistas, aínda que admitiu que aínda non está nada "concretado".