Xosé Ramón Barreiro con Feixóo na entrega do premio. Xoán Crespo

O máximo representante da Real Academia Galega non quixo perder a oportunidade que lle brindou a entrega do XXV Premio 'Celanova, casa dos poetas' para censurar a política lingüística da Xunta. Nada máis recibir o galardón, declarou aproveitar “un dos poucos púlpitos que agora ten o presidente da RAG” para chamar a atención sobre a “crispación” que vive Galiza en torno ao idioma.

Xosé Ramón Barreiro asegurou que a institución “non pode gardar silencio, nin mirar para outra parte” mentres o Goberno galego “toma decisións e fai decretos que afectan ao futuro do galego de costas á propia RAG” que, segundo dixo, “é por norma, responsábel do coidado da lingua galega”.

Nun auditorio presidido por Alberte Núñez Feixóo, que estaba acompañado polo conselleiro de Educación, non dubidou en responsabilizar o presidente galego do “desasosego” que xera a cuestión lingüística, un asunto que “parecía asentado” nos últimos anos. “Non foi a RAG, señor presidente, a que removeu as augas”, espetou, e como “representante dunha institución que ten responsabilidades sobre o idioma” lembrou que “os poderes públicos non deben crear problemas” neste eido.

Ademais, Barreiro animou os presentes a “seguir sendo rebeldes para loitar pola liberdade, a democracia e unha cultura galega que sen a lingua aparece desmembrada”. Nesta liña, dirixiuse a políticos e intelectuais para subliñar a “súa obriga” de “transmitirlles ás novas xeracións a nosa cultura, sen minorizala nin rebaixala”.

Minutos despois, Feixóo valorou a existencia de "democracia, liberdade, linguas" para expresarse e pediulle a "institucións, academias e poetas" camiñar "xuntos". Do mesmo xeito, asegurou que a RAG “é o anticipo da Galiza que queriamos: plural e amigábel; punto de encontro de galegos espiritualmente libres, que soñaban cunha autonomía que sirva para que as mulleres e os homes se realizasen ao seu xeito, afastados de dogmatismos e sen maior modelo que eles mesmos".