O director xeral de Industria, Enerxía e Minas, Anxo Bernardo Tahoces [á dereita] e o conselleiro de Industria, Xavier Guerra.. AGN

Unha das promesas sobre as que o PP asentou a pasada campaña electoral era a derrogación do decreto eólico e a anulación do concurso polo que o goberno bipartito pretendía repartir 2.300 MW de potencia. A comezos do mes de agosto, cando remataba o simbólico período dos cen primeiros días de goberno conservador na Xunta, Xavier Guerra, conselleiro de Economía e Industria, anunciou o cumprimento deste compromiso.

Non obstante, o equipo de Feixóo non foi quen de derrogar o decreto do bipartito antes das vacacións, e semella que haberá que esperar meses até que comece a funcionar a nova política eólica galega. O último Consello da Xunta antes das vacacións de verán só puido aprobar un informe “polo que se regula o aproveitamento eólico en Galicia e se crea o canon eólico e o Fondo de Compensación Ambiental”. Este documento, segundo expertos en dereito administrativo, non pasa dunha declaración de intencións sen validez xurídica.

Aínda así, o conselleiro de Economía e Industria asinou unha resolución pola que suspende a tramitación do concurso. O obxectivo é aprobar canto antes unha nova lei. Con todo, o gabinete de Xavier Guerra indica que a autorización dos novos parques levarase a cabo, como moi cedo, a finais do segundo semestre do ano que vén.

Unha nova taxa substituirá a participación pública

Bernardo Tahoces, director xeral de Industria, argumentou que “a participación pública é unha tacha directa e infranqueábel”, que converte o concurso do bipartito en ilegal. Máis aínda, a fórmula do reparto como concurso público é inconstitucional segundo os conservadores. Esta última non deixa de ser unha opinión, xa que o predecesor de Tahoces no cargo, o economista Anxo Calvo Silvosa, publicou recentemente un artigo na revista Análise Empresarial na que explicaba polo miúdo o proceso seguido polo bipartito e defendía a legalidade do proceso. Ademais, non existen sentenzas xudiciais ao respecto. En canto á participación pública, está contemplada nas leis que se aplican en Navarra e Euskadi. Mesmo en Galicia hai pequenos parques municipais en mans de concellos.

Os parques eólicos non quedarán exentos da compensación á sociedade. O PP prevé que a nova lei eólica cree un novo imposto, chamado “canon ambiental”. A contía será fixa e dependerá do número de muíños. Así, un parque que non supere os tres estará exento. De catro a sete deberá pagar 2.300 euros por cada un. Se a instalación está composta por entre oito e 15 pagará 4.100 euros por unidade, contía que ascenderá até os 5.900 se supera esa cifra de aeroxeradores.

O BNG criticou a eliminación da participación pública. Fernando Blanco, ex conselleiro de Industria, lamentou que os argumentos que emprega hoxe a Xunta sexan os mesmos que utilizaron as grandes corporacións para meterlle presión cando desenvolvía o decreto. Pola súa banda, Xaquín Fernández Leiceaga, portavoz do PSdeG no Parlamento criticou a implantación dun canon eólico xa que o PP se opuxo á aplicación do canon hidroeléctrico nos mesmos termos cando estaba na oposición.