Teresa Moure recolle o XIII María Casares a mellor texto orixinal por 'Unha primavera para Aldara'. L.R. Trátase dun dos festivais de teatro amador máis importantes de Galicia: o Teatro no Camiño de Santiago arrinca en Palas de Rei este xoves 20 de agosto, e continuará até o 6 de setembro. Entre as novidades do programa, é salientábel un curso de formación para actores e actrices afeccionados (do 24 ao 27 de agosto, entre 9.00 e 14.00). Co título "O corpo creativo", impartido polo profesor da Escola Superior de Arte Dramática de Galicia Ricardo Solveira, rematará cunha representación a cargo das persoas participantes. O prezo é de 30 euros, e só hai 20 prazas. A inscrición pode facerse a través do número 670 523 688.

En canto ás propostas que subirán ás táboas, amais de oito compañías galegas, pasarán polos escenarios outras tres, chegadas de Valencia, Cuenca e Moscova. As representacións terán lugar de xoves a domingo, ás 21.00, na Casa da Cultura de Palas. A mostra está organizada por Metátese Teatro, un dos grupos afeccionados máis activos do país, con case 17 anos de traxectoria, e a Orde de donas e cabaleiros do priorato de Vilar de Donas.

Amais, o pasado xoves 13 xa se deron a coñeceros premios Mácara de teatro e Careón de literatura. O primeiro deles recae, na súa sétima edición en Ángeles Cuña Bóveda, directora da compañía ourensá Sarabela Teatro; mentres que o segundo, que se concede por terceira vez, foi a parar á escritora Teresa Moure, gañadora do Premio Rafael Dieste no 2007 por Unha primavera para Aldara, cuxa montaxe, a cargo de Teatro do Atlántico, arrasou na última edición dos premios María Casares.