A Xunta autoriza en setembro a construción dunha piscifactoría en Touriñán e anula catro dos proxectos acuícolas aprobados polo bipartito

Segundo unha información facilitada hoxe pola cadea SER, o TSXG ditou unha sentenza que anularía o Plano Acuícola de López Veiga por consideralo ilegal ao incumprir normativas medioambientais e a lexislación europea. Do mesmo xeito, segundo informa a emisora de radio privada, a sentenza considera ilegal o método seguido no ano 2006 para anular este Plano e aprobar así un novo Plano Acuícola.

En opinión de Lobeira, a decisión do TSXG sería "moi positiva porque introduce un criterio xurídico de sensatez e sentido común" e, ao mesmo tempo, esta decisión constituiría "unha oportunidade para partir de cero e elaborar unha lexislación co consenso das forzas políticas no Parlamento, as organizacións ecoloxistas e sindicais e os concellos implicados".

O portavoz nacionalista, insta a que se coiden aspectos coma "o emprazamento das plantas acuícolas" e lembra que dende o BNG sempre se mantivo un criterio moi crítico coa "desaforada aposta política do PP pola acuicultura con independencia dos seus custes sociais, medioambientais, etc". Nesta liña de actuación, os gobernos populares desenvolveron unha política que simultaneaba a implantación deste tipo de explotacións coa "subvención para o despece da frota", sempre coa oposición do BNG.

Paralización das plantas en marcha

O portavoz nacionalista de Pesca e Marisqueo considera que esta decisión do alto tribunal galego obrigaría ao goberno popular a "paralizar as dúas actuacións que ten actualmente en marcha no cabo Touriñán e en Mougás (Oia), onde existía unha orde de demolición que foi desatendida polo goberno que acaba de conceder o permiso para a ampliación desta planta".