Acto do BNG na Quintana o Día da Patria 2009. Manuel Vilas O BNG celebrará o 'Día da Patria' baixo o lema 'Movámonos polo noso idioma e polo emprego', co que pretenden conciliar "as dúas cousas máis importantes en Galicia actualmente". Así, tras a homenaxe que onte renderon a Rosalía de Castro e Castelao, organizado pola organización xuvenil Galiza Nova, hoxe aspiran a conseguir unha manifestación "masiva".

"Esperamos que sexa masiva, como están sendo as dos últimos anos", sinalaron a Europa Press fontes do BNG, quen apuntaron tamén que o Bloque participou en máis de 100 actos "por toda Galicia desde hai un par de semanas" para celebrar o 25 de xullo.

'Movámonos polo noso idioma e polo emprego' pretende "conciliar" a mobilización da sociedade "contra os ataques do Goberno galego á lingua" e contra unha crise que "destrúe miles de empregos".

O PSdeG foi o máis rápido en abrir o debate sobre o Estatuto

O PSdeG desprazarase novamente ata Rianxo para depositar flores ante o monumento erixido en memoria do intelectual galeguista Afonso Daniel Rodríguez Castelao, no seu pobo natal. Este ano, os socialistas realizaron un esforzo "maior" de mobilización, polo que aspiran a reunir a unhas 200 persoas nun acto cuxo protagonista será a reforma do Estatuto, que reclaman que se aborde de inmediato.

A Rianxo trasladarase a plana maior do partido, posto que está prevista a presenza dunha nutrida representación do partido. "Este ano terá unha dimensión maior tanto cualitativa como cuantitativamente", sinalaron a Europa Press fontes socialistas.

O líder dos socialistas galegos, Manuel Vázquez, lerá un manifesto ante unhas 200 persoas entre as que figurarán membros da dirección e do Grupo Parlamentario. A presenza do ex presidente da Xunta Emilio Pérez Touriño non está confirmada neste Día de Galicia, o primeiro desde a perda da Presidencia da Xunta tras as eleccións do 1 de marzo.