Manuel Vázquez co responsábel de Educación do PSdeG, Guillerme Meixón. AGN

O secretario xeral dos socialistas galegos, Manuel Vázquez, explicou en rolda de prensa que moitos pais están "atónitos" ante a medida anunciada pola Consellaría de Educación, polo que "loitarán contra a inxustiza social" e buscarán que a gratuidade dos libros sexa un "acordo de Estado".

Deste xeito, o PSdeG promoverá en todos os concellos mocións nas que se recollerá que a educación constitúe un "dereito básico e universal" para toda a cidadanía. Nelas, os municipios instarán á Xunta a que "continúe co modelo de gratuidade dos libros de texto no ensino obrigatorio" impulsado polo anterior goberno, en busca dun "sistema educativo universal, de calidade e gratuíto para todos".

Segundo expuxo na súa intervención Manuel Vázquez, o Goberno galego ampárase no paraugas da "austeridade" para levar a cabo un modelo que, a longo prazo, será "máis caro" que o impulsado pola anterior Consellaría de Educación, que incluía un sistema de préstamo de libros.

"Promoven un modelo un 25 por cento máis caro que beneficiará un 22 por cento da poboación", sentenciou Manuel Vázquez para censurar o cálculo de "dobre xogo" que realizou o goberno da Xunta para estimar o aforro.

"Dobre xogo"

A este respecto, o responsábel de Educación do PSdeG, Guillerme Meixón, tamén presente na rolda de prensa, explicou que o aforro que anunciou a Xunta benefíciase do sistema de préstamo instaurado polo bipartito, de xeito que nos anos sucesivos aínda redundará positivamente este modelo. "Non contabiliza o custo real da supresión da gratuidade de libros", alertou.

Ademais, Manuel Vázquez asegurou que esta "medida retrógrada" só lle beneficia os libreiros, cos que a Xunta "quere quedar ben". Malia apostar por  que este colectivo "non saia mal" e se articulen medidas para "axudalo", censurou que se elimine un modelo no que "todo o mundo saía gañando".

Os socialistas calculan que unhas 130.000 persoas non contarán con libros gratuítos por mor desta medida, fronte ás 37.000 que recibirán "unha axuda similar" da nova Xunta á que tiñan anteriormente. Por esta razón, o PSdeG buscará o apoio de todos os colectivos que queiran colaborar na recollida de firmas en contra desta supresión.