Manuel Pinho, ex ministro luso de Economía

Pinho, que ostentaba o cargo desde 2005, simulou uns cornos coas súas mans, xesto que dirixiu ao portavoz dos comunistas lusos, Bernardino Soares, despois de que lle recriminase a súa actitude por un problema laboral xurdido nas minas de Aljustrel, ao sur do país.

Soares, que considerou a acción "pouco educada", solicitou a dimisión de Pinho que, a pesar de pedir desculpas rapidamente, xustificou a súa reacción ao sentirse ofendido polas acusacións do deputado comunista.

Segundo recolle elEconomista, a complicada situación laboral que viven as minas de zinc de Aljustrel, no Alentejo, son a orixe do incidente entre Pinho e Soares. O líder comunista acusou o ministro de limitarse a visitar a zona para "entregar cheques", o que provocou a reacción por parte do ministro.

O substituto

O responsábel de Finanzas, Fernando Teixeira dos Santos, será o encargado da carteira do ministro saínte, polo que acumulará ambas até as eleccións lexislativas do próximo setembro.

O primeiro ministro portugués lamentou o comportamento de Pinho e declarou, tras o final do debate do Estado da Nación, que foi un "xesto fatal", pero salientou que o Goberno redimiu o "episodio" inmediatamente.

“Agradezo o feito de que Manuel Pinho comprenda que non tiña que realizar este xesto e teño a certeza de que está arrepentido e laméntao", engadiu.

Sócrates tamén tivo palabras de recoñecemento para o ministro saínte e indicou que "deu o mellor estes catro anos ao servizo do país, especialmente en relación ás minas de Aljustrel". "Sei o empeño que mostrou para que algunha empresa comprara as minas coa fin de evitar a quebra. Son consciente do que custa oír críticas inxustas no Parlamento".

A dimisión de Pinho, o sexto cambio de ministros desde que o Partido Socialista conseguiu a maioría absoluta en 2005, marca o último gran enfrontamento político entre o Goberno e a oposición no Parlamento antes de que se celebren as eleccións lexislativas o próximo 27 de setembro.