. Otto/AGN

Na primeira fase da denominada 'Operación de Tráfico de Verán 2009', que se desenvolverá dende hoxe e até o 5 de xullo, a DXT estima uns 316.000 movementos por estrada na Comunidade galega, o que supón un oito por cento de todo o Estado.

En concreto, segundo os datos da DXT, no mes de xullo Galiza  rexistrará uns 3.649.500 desprazamentos, mentres que no mes de agosto Tráfico prevé 3.910.500 movementos por estrada, o 9 por cento dos máis de 43 millóns que esperan no conxunto do Estado.

As estradas de Galiza que se verán afectadas cunha maior intensidade de tráfico na primeira fase da operación estival, que se desenvolverá dende as 15.00 horas do día 3 até a media noite do domingo 5, son a AP-9, AP-53, AG-53, A-6, A-52, A-55, N-550 e a N-634.

Operativos especiais

Ademais, Tráfico pon en marcha operativos especiais para achegar "maior seguridade e fluidez" nas datas punta (fins de semana, pontes, principios de mes e cambios de quincenas). Durante todo o verán se prestará especial atención ás fins de semana cando se rexistra maior movemento de vehículos, xa que segundo a DXT, os costumes españois evolucionaron nos últimos anos e xa non se inician os días 1 e 15 de cada mes, se non coincidindo coas fins de semana.

Por iso, a primeira das operacións especiais desenvolverase durante esta fin de semana e continuaranse dispoñendo as fins de semana do 10 ao 12 de xullo, do 17 ao 19 de xullo, do 7 ao 9 de agosto e do 21 ao 23 de agosto.

Tamén está previsto poñer en marcha dispositivos especiais do 24 ao 26 de xullo, coincidindo coa festividade de Santiago nas comunidades de Galiza, Madrid, Navarra e A Rioxa; o 1 e 2 de agosto, polo inicio de vacacións do mes; do 14 ao 16 de agosto, pola ponte festiva e celebración do 15 de agosto; e do 28 ao 31 de agosto, polo final de mes e coincidencia con fin de semana.