Embarcación de Samertolameu. María Muíña

A estrea será en augas bilbaínas este sábado día 4 ás 18h00 coa celebración da décimo primeira edición da Bandeira Telefónica-Gran Premio Vila de Bilbao. A proba será unha contra reloxo individual de tres millas náuticas (5.556 metros) de percorrido, que contará con catro longos e tres ceavogas. A televisión autonómica vasca retransmitirá a regata en directo, nunha xornada na que se repartirán 22.500 euros en premios.

As perspectivas de cara á Liga son un grande reto para as embarcacións galegas, tanto para Samertolomeu, que se estrea esta tempada, como para Tirán, que despois dun descenso en 2004 volveu entrar no último play-off e con ganas de dar guerra.

Cómpre ter en conta tamén que os galegos non contan cos mesmos recursos económicos dos que dispoñen algúns dos clubs vascos ou cántabros. Os patrocinios e subvencións danlles a posibilidade a clubs como Astillero ou Castro Urdiales de facer fichaxes importantes e contratos que lles permiten aos deportistas vivir do seu esforzo, de feito algúns dos mellores remeiros galegos rematan emigrando para poder adicarse á competición.

Así e todo a entrega, os adestramentos e o bo traballo de equipo conseguen que en todas as edicións da Liga ACT estivese presente sempre algunha traíña galega.

A grande ausencia: Cabo da Cruz

O club boirense, que estivo en todas as edicións deuse de baixa este ano despois dunha traxectoria cuns resultados moi dignos e incluso grandes vitorias, como o primeiro posto na Bandeira de Hondarribia de 2004 ou os seus postos entre o sexto e o noveno lugar nas clasificacións xerais dos últimos anos. Desde a actual directiva do club falan de motivos coxunturais de plantel para non asumir a responsabilidade de participar esta tempada, mais non descartan unha volta en próximas edicións.

A outra traíña que tamén competiu coas estrelas do remo foi Mecos. A embarcación do Grove comezou con moita forza o primeiro ano, cun magnífico segundo posto en 2003 e cuns resultados sempre moi pelexados con Cabo da Cruz, o seu eterno rival. Mecos, tampouco estivo presente na ACT a pasada tempada 2008.