Iván Puentes, alcalde de Fene. AGN

O rexedor fenés, acompañado dos outros seis concelleiros que conforman o grupo municipal socialista, explicou que a nova organización de áreas xa está entregada na secretaría municipal e entrará en vigor nas próximas horas. Iván Pontes aclarou que os grupos municipais da oposición (BNG, PP, IU-EU) xa foran informados previamente.

Na nova estrutura, os concelleiros de goberno manteñen as anteriores responsabilidades, para evitar "freos ou parálises", pero incorporan as competencias que ocupaba con anterioridade o BNG.

Iván Pontes transmitiu un "sentir de optimismo" ante a nova etapa que enfilan os socialistas en Fene, e as súas "ganas desbordantes" e a "vontade decidida" de "acelerar o cambio, a transformación e as medidas comprometidas en 2007". Nas últimas eleccións municipais, o PSOE desbancou os nacionalistas por primeira vez en 27 anos.

"Afrontamos a nova etapa co convencemento de que todos os cambios se producirán en beneficio dos veciños de Fene", asegurou Puentes, que prometeu "traballar o triplo, o cuádruplo ou o quíntuplo que até agora".

O rexedor fenés anunciou a súa vontade de xestionar con "man tendida" e con vontade de "diálogo" coa oposición, formada por cinco concelleiros do BNG, catro do PP e un de Izquierda Unida-Esquerda Unida.

O concelleiro de Obras, Xoán Antonio López Rodríguez, unha das persoas chaves do equipo de Puentes, encargarase a partir de agora da Concellaría de Servizos e Mantemento, unha das que máis discrepancias xerara no seo da coalición, ante a suposta "mala xestión" que lle atribuían os socialistas.

A edil de Deportes e Mocidade, Carme Silvar, encargarase de Educación e Ensino; Rocío Rei, de Participación Cidadá, asumirá Benestar e Igualdade; Juan Manuel Lourido, actual responsábel de Emprego e Persoal, farase cargo de Seguridade Cidadá; e a área de Promoción Económica, que engloba turismo e polígonos industriais, será xestionada por Puentes.

A actual concelleira de Medio Ambiente, Amalia García, responsabilizarase de parte da área de Mantemento, en concreto, a división de xardinería, e Manuel Rodríguez Carballeira, seguirá levando Urbanismo e Facenda.