En todo o Estado 124.479 mozos perciben actualmente a Renda Básica de Emancipación (RBE), tras incrementarse en 25.156 os beneficiarios destas axudas durante o segundo trimestre do ano, cun crecemento do 25,3 por cento sobre o primeiro.

Desde a entrada en vigor desta renda, consistente nunha axuda de 210 euros ao aluguer, o Departamento que dirixe Beatriz Corredor ordenou pagos en prestacións aos beneficiarios por importe de 253,36 millóns de euros, dos que 246,36 millóns corresponden ao pago de mensualidades e aval, e 7 millóns a pagos de préstamos de fianza.

Vivenda destacou que esta axuda á emancipación segue á alza. Dende que se puxo en marcha presentáronse 255.642 solicitudes, 27.213 delas realizadas no segundo trimestre. Do conxunto de solicitudes, 180.234 obtiveron unha resolución positiva e en 128.432 casos logrouse verificar o pago do aluguer por parte do beneficiario, requisito necesario para percibir a subvención.

As mulleres continúan sendo as principais demandantes da RBE. Ao finalizar xuño, o 56,1 por cento dos perceptores desta axuda (69.892) eran mulleres, e o resto, homes (54.587).

Madrid encabeza o ranking de beneficiarios, con 19.031 perceptores, seguida de Catalunya (18.989), Andalucía (15.573), Castela e León (10.530), Galiza (10.280) e Comunidade Valenciana (8.819).

Mozos de entre 26 e 29 anos

Por idade, as maiores porcentaxes de beneficiarios dánse entre os 26 e os 29 anos, concentrándose nese tramo o 63,4 por cento dos perceptores, mentres que o 26,3 por cento ten entre 23 e 25 anos. Para rematar, o 1,9 por cento ten 22 anos e o 8,3 por cento, 30 anos, idade mínima e máxima para poder cobrar a axuda, respectivamente.

O 29,6 por cento dos perceptores da RBE pagan menos de 400 euros no aluguer da súa vivenda; o 42,7 por cento, entre 400 e 600 euros; o 20,7 por cento, entre 600 e 800 euros; e o 6,9 por cento, máis de 800 euros.

Segundo os ingresos dos beneficiarios, o 38,6 por cento teñen unhas rendas de entre 10.000 e 15.000 euros, o 36,5 por cento teñen uns ingresos de entre 15.000 e 22.000 euros, e o 24,8 por cento gana menos de 10.000 euros.