Laboratorio da USC onde se investiga sobre o cancro. VíaLactea Baixo a denominación de 'Inberso', a idea nace do programa Uniemprende, polo que o seu director, Carlos Hernández, será o encargado de presentala na última conferencia do congreso, que se celebrará entre o luns e o martes na facultade de Química de Santiago de Compostela.

Así, o obxectivo deste mercado financeiro alternativo será captar investidores, "que a xente meta pasta" nos primeiros momentos, segundo explicou Rodeiro, porque ao ser de base tecnolóxica unha empresa ten "moito maior risco" e "o seu problema é o do financiamento", indicou.

En declaracións a Europa Press, o profesor de Administración e Dirección de Empresas explicou que un 'spin-off' universitario é unha empresa que ten como orixe a universidade, "o mesmo que sucede con series como 'Aida', que naceu a partir de '7 vidas'", exemplificou.

"Pode xurdir a partir de persoal universitario ou a partir de proxectos de investigación", indicou, aínda que apuntou que o máis habitual é que sexan de base tecnolóxica. No conxunto do Estado español, naceron 120 compañías deste tipo en 2007, e 143 en 2006.

Segundo destacou, Galiza é "unha das comunidades autónomas pioneiras" en España en creación de empresas de base tecnolóxica, xunto con outras como Valencia, Madrid e Catalunya"

USC, pioneira

A diferenza, segundo sinalou, é que nestas comunidades existen universidades politécnicas, "polo que é máis normal" que aparezan 'spin-off'. Non obstante, a USC caracterízase por contar cun programa de creación de empresas "bastante pioneiro", dixo, en referencia a Uniemprende.

Así, explicou que este programa ofrece servizos xunto con Uninova, "unha incubadora de empresas" que se sitúa no Polígono do Tambre. Esta nave industrial achega servizos comúns para as 'spin-off' como son o acceso á internet, a telefonía ou asesoría. "E permite estar alí ás empresas", incidiu.

Todo isto complétase con Unirisco, que dá un financiamento de "capital risco", o que significa que a entidade participa nas novas sociedades. Unirisco foi, á súa vez, o xerme de Uniinves, que engloba a unhas 20 universidades, empresas e bancos.

Ademais, a novena edición do congreso centrarase no concepto de 'ecoemprendimiento' e na importancia das redes sociais, sobre o que numerosos profesionais discutirán e intercambiarán experiencias durante as dúas xornadas.

Á inauguración acudirán o reitor da USC, Senén Barro; o secretario xeral de Universidades, Marius Rubiralta; o director xeral de Promoción do Emprego, Andrés Hermida; e o subdirector xeral da División Global Santander Universidades, Xosé Manuel Moreno.