Barack Obama, presidente dos Estados Unidos. Kevin Lamarque/Reuters A aprobación logrouse tras meses de negociacións e no medio da resistencia dos republicanos que afirmaron que de promulgarse a lei eliminará fontes de emprego nun momento en que o país enfronta unha dura recesión.

Con todo, segundo informou a Oficina de Xestión e Orzamento da Casa Branca (OMB), Obama pensa que a medida axudará a "reducir a nosa dependencia do petróleo estranxeiro, fortalecer a seguridade enerxética e nacional, e crear millóns de novos postos de traballo en todos os EE UU".

A iniciativa contén cláusulas para a protección dos consumidores, a redución dos custos enerxéticos e para fomentar unha transición cara a unha economía con fontes de enerxía que reduzan a contaminación ambiental.

Os límites

Unha vez promulgada por Obama, a lei imporá límites ás emisións de dióxido de carbono e outras sustancias tóxicas por parte das plantas xeradoras de enerxía, as fábricas e refinerías. Tamén fomenta o desenvolvemento de fontes alternativas de enerxía renovábel.

O proxecto estabelece ademais un mercado de carbono, no que as empresas poderían comprar e vender permisos para contaminar, co fin de crear un incentivo económico para reducir as emisións.

A lei supón que no 2020 un 12 por cento da enerxía que distribúan as compañías de electricidade deberá proceder de fontes renovábeis. Tamén recolle a obrigatoriedade de recortar as emisións de gases que provocan o efecto invernadoiro nun 17 por cento respecto dos niveis do ano 2005, para 2020, e nun 83 por cento para 2050.

De momento, non está claro se os demócratas lograrán reunir os votos para a aprobación definitiva da lei, que tamén debe ser aprobada no Senado.