Protesta contra a reforma da Lei da Función Pública que limita o galego nos exames. Manuel Vilas O secretario da CIG-Administración, Manuel Gallardo, explicou que editarán carteis e publicacións coas súas reivindicacións básicas, que distribuirán polos centros de traballo, co fin de dalos a coñecer e denunciar que o Goberno galego "non está gobernando, senón que está impondo un criterio en casos concretos".

Gallardo citou a decisión de eliminar o exame obrigatorio en galego nas oposicións, que se retirou coa aprobación da reforma da Lei de Función Pública do pasado martes no pleno do Parlamento, e a de subir en 210 euros o soldo dos xefes territoriais da Xunta.

O sindicalista reprochou que o Executivo galego está "ignorando os sindicatos" e "ten paralizada a administración". En resposta a iso, a campaña da CIG, que será máis "forte" tras o verán, "prolongarase no tempo até que o goberno do PP sente a negociar as condicións dos empregados públicos".

Entre os aspectos máis urxentes, Gallardo fixo referencia á negociación dun novo texto da Lei de Función Pública, que tería que entrar en vigor, segundo o Estatuto Básico do Empregado Público –indicou– a finais de 2008. "Aquí non empezamos sequera a negociar", lamentou.

Xubilación anticipada

Así mesmo, reclamou a regulación da xubilación anticipada, que pediu que sexa potenciada pola administración. Neste sentido, a central sindical recordou que, segundo a lei, existe a posibilidade de que o empregado público pase a facer o 20 por cento da súa actividade ou que se acolla a unha xubilación completa subvencionada polo Estado.

Do mesmo xeito, insistiu na necesidade dun concurso de traslados, posto que parte do persoal que obtivo praza na última oferta de postos laborais, en 2005, aínda non tomou posesión definitiva.

As reivindicacións da CIG, sostivo o responsábel da área Administración, están "recollidas no programa electoral do PP". "Antes do 1 de marzo había a mesma crise que hai agora", afirmou e instou o Goberno a "facer algo".