Fala un dos rescatadores do Codero. X.B./R.R.

Os labores de procura dos catro mariñeiros desaparecidos no naufraxio a madrugada de onte do pesqueiro 'Cordeiro' estanse vendo dificultadas polo temporal "duro" do Oeste que se rexistra na zona, a 30 millas de Cabo Prior, con ondas de ata sete metros e ventos de forza 8/9 (máis de 70 quilómetros por hora) co que a visibilidade é moi reducida.

Con todo, o remolcador 'Don Inda' e o helicóptero 'Helimer Galicia' están traballando na zona, segundo confirmaron a Europa Press fontes de Salvamento Marítimo, quen indicaron que, no entanto, están á espera de que melloren as condicións climatolóxicas outro remolcador e dúas embarcacións Salvamar, do mesmo xeito que os helicópteros 'Pesca I' e 'Pesca II' están tamén dispoñibles para relevar ao 'Helimer Galicia' en canto este deba regresar a terra a encher combustible.

Salvamento Marítimo admitiu que espera que ao mediodía ou primeiras horas da tarde do día de hoxe melloren as condicións na mar e, xa que logo, "aproveitarase" calquera situación máis favorable para mobilizar estes medios. No entanto, tamén revelou que as predicións apuntan a que o temporal se recrudecerá ao longo da tarde.

Os catro desaparecidos no naufraxio do 'Cordeiro' son dous galegos, Alberto Otero González e José Afonso Sotelo, e outros dous de nacionalidade indonesia. Outros tres tripulantes puideron ser rescatados con vida --Marco Antonio Ures, José Manuel Parada e Hendra Hemoguan-- e un cuarto faleceu, o primeiro mecánico, Francisco Alboreda Rei.

Supervivientes

Dos tres rescatados con vida, dous deles, José María Parada e Hendra Hemoguan, foron dados de alta tras permanecer en observación no Hospital Juan Canalejo na Coruña nas últimas horas debido á hipotermia que sufriron, mentres que o patrón maior do barco, Marcos Antonio Ures García, evoluciona "favorablemente" no centro hospitalario.

Segundo confirmou a Europa Press o armador do barco, José María Santiago, o contramaestre, José Manuel Parada, e o mariñeiro de nacionalidade indonesia Hendra Hemoguan, recibiron o alta e abandonaron o hospital minutos antes das 13.00 horas.

O patrón Marcos Antonio Ures, de 29 anos de idade que, aínda que está casado en Malpica, é natural de Ponteceso, do municipio de Ribeira, permanecerá uns días no centro hospitalario tras ingresar onte cun cadro clínico de hipotermia "leve".

Con respecto á situación do patrón, fontes próximas á empresa armadora explicaron que onte se atopaba "moi nervioso" e en estado de 'shock' polo acontecido, aínda que apuntaron que na xornada de hoxe mellorara e estaba "máis relaxado e máis tranquilo".