Crianzas nunha escola. Paco Vilabarros Así, co respaldo de CC OO; ANPE; STEG e UGT, na reunión decidiuse que cando os alumnos de primaria sexan do mesmo ciclo serán agrupados se o número dos mesmos é de 14 ou inferior. No caso da unión de estudantes de primaria, matriculados en diferentes ciclo, a agrupación realizarase se o número de inscritos é de 12 persoas ou menos.

No caso do alumnado de educación primaria de distinto ciclo, sempre que afecte aos tres ciclos, realizarase o agrupamento cando o número máximo sexa de 10 alumnos.

Pola súa banda, os alumnos de educación infantil e primaria que se unirán na mesma aula serán aqueles que estean matriculados en centros nos que a suma de todos non supere os 10 estudantes.

A mesa sectorial tamén decidiu que os alumnos de infantil dun mesmo ciclo, excepto os de tres anos, estarán na mesma unidade se o máximo é de 14 persoas. E para os de tres anos a unión darase cando o alumnado sexa de 12 persoas ou menos.

Formación específica

En todos os casos, segundo explicou a Consellaría de Educación, computará o alumnado que repita curso. Do mesmo xeito, os casos dos alumnos con necesidades educativas especiais serán analizados se ven afectados pola agrupación. Na mesa aprobouse que todas as supresións serán debatidas na Xunta de persoal.

Tamén aprobaron que o profesorado que teña que dar clases a alumnos de diferentes idades recibirán formación específica para responder ás necesidades de cada un deles.

Carácter obrigatorio

A proposta aprobada foi rexeitada pola CIG-Ensino porque "non supón un avance significativo co que até agora se aplicaba". Ademais, a central nacionalista criticou que "estabelece o carácter obrigatorio dos agrupamentos, aínda que posteriormente se estuden nas xuntas de persoal"; e mantén as cocientes de 25 alumnos por aula, cando son da mesma idade, "tamén en infantil, a pesar de figurar no programa do PP que debería ser 15".

Así mesmo, a CIG sinalou que estabelece "un número moi alto" de alumnos para os agrupamentos entre ciclos de primaria; recolle a posibilidade de realizar agrupamentos entre diferentes etapas e entre os tres ciclos de primaria.

Por iso, o sindicato lamentou que o resto de centrais "dean o seu aval a uns criterios que eran practicamente os que se aplicaban desde 2003" e sobre os que, recordou, "no seu día non houbo acordo entre Administración e sindicatos".

Deste xeito, a CIG considerou que este acordo "incidirá negativamente no rural" e que se traducirá nun elevado número de supresións o próximo curso escolar e nos seguinte".

Reaccións

A postura da CIG foi cualificada polo director xeral de Centro e Recursos Humanos, Xosé Manuel Pinal, de "posición intransixente" e que "non permite alcanzar nunca un acordo satisfactorio para todas as partes".

Tanto o sindicato ANPE como STEG valoraron o "avance importantísimo" con esta proposta porque se pasa da aplicación de 20/15 que propuña a consellaía a acordar hoxe 14/12 para infantil.

"Até o día de hoxe agrupábanse até 20, tal como marca a LOE", recordou STEG. "Isto suporá evitar a supresión de moitas unidades e a creación de novas unidades en moitos centros do rural de Galiza", agregou.