Plano do proxecto de Pescanova para Touriñán, en vermello a zona protexida. ADEGA

Os postos de traballo son menos dos prometidos e non abondan para xustificar a invasión da Rede Natura. Este é un dos argumentos dos dous principais grupos ecoloxistas galegos (Adega e Verdegaia) ao anuncio da Xunta de retomar o proxecto da macropiscifactoría de Pescanova en Touriñán.

O Cluster cifra en 270 os empregos en toda Galicia

Os ecoloxistas de Adega cualifican de “irreais” os empregos prometidos. Argumentan que inicialmente, cando o primeiro Plano Acuícola do Goberno Fraga, a compañía ofrecía 3.000. Antes de que o bipartito descartase o proxecto polo seu impacto na costa, Pescanova cifraba o emprego en 300.

Unha cifra máis baixa pero aínda moi discutíbel, pois nas seis granxas de rodaballo de Galicia só traballan 270 persoas. É un dato do  Cluster de Acuicultura de Galicia, ente patronal no que participa a propia Pescanova.

Verdegaia alerta dun “fraude de lei” para invadir a Rede Natura

Dende Verdegaia, o anuncio da Xunta de “recuperar o tempo perdido” é cualificado de “auténtica aberración”. O seu portavoz Xan Duro insiste na “barbaridade que suporía ocupar un dos espazos máis senlleiros da costa galega”.

Duro advírtelle a Rosa Quintana, conselleira do Mar, que, no caso de ceder as presións de Pescanova, denunciarán o asunto en Bruxelas. E é que os terreos ambicionados pola multinacional son parte da Rede Natura, figura da UE que protexe lugares de especial interese ambiental.

A lei só permite obrar en Rede Natura no caso de actuacións de interese público e de urxencia. Supostos que, en opinión de Verdegaia, non cumpre a macropiscifactoría salvo que a Xunta perpetre unha “fraude de lei”.

En Cabo Vilán traballan 30 persoas, segundo os ecoloxistas

O principal estandarte do Goberno conservador son os postos de traballo que crearía o macroproxecto. Unha verdade a medias, pois, por exemplo, a gran piscifactoría chantada ao pé doutros dos faros máis importantes do país, Cabo Vilán, emprega menos de trinta persoas, lembra Duro.

Ademais, o ecoloxista argumenta que deses poucos empregos moitos son especialistas cualificados, que non poderán cubrirse na Costa da Morte. Duro insiste en que retomar o proxecto en Touriñán sería ilegal e adianta que Verdegaia coordinará unha resposta canda outros grupos ecoloxistas do país.