Durante os case catro anos de executivo de PSdeG e BNG, que coincidiron coa xestión socialista no Goberno central, os galegos concluíron, no 40,8 por cento dos casos, que a política desenvolvida polo Estado foi "máis ben desfavorábel" para Galiza.

En conxunto, o 50,3 por cento dos enquisados cualifica como regular a xestión de Zapatero e só o 16,2 por cento a considera boa ou moi boa. Con todo, unicamente o 24,5 por cento opina que as cousas irían mellor se gobernara o PP, o 34 por cento pensa que sería igual e o 25,1 por cento contesta que sería peor a situación.

Perto da metade dos enquisados observan que a situación económica en Galiza é mala ou moi mala (49,2 por cento), aínda que son máis os que a ven deste xeito no ámbito estatal, ao alcanzar o 56,6 por cento o número de entrevistados que escollen malo ou moi malo para falar deste panorama en España.

No canto á situación política galega, o 42,2 por cento entende que é regular, fronte ao 43,3 por cento que opina desta forma en relación ao conxunto do Estado. Ademais, o 35,6 por cento tacha de malo ou moi malo o panorama político en Galiza, fronte ao 37,5 por cento que opina así en relación a España.

O 84,9 por cento dos galegos afirma que acudiu ás urnas o pasado 1 de marzo, o que supón unha cifra máis alta que a de participación rexistrada na noite electoral, que alcanzou o 70,4 por cento.

Dos que declaran ter emitido o sufraxio, o 74,3 por cento afirma que o tiña decidido antes, o 10,4 por cento que tomou a determinación a primeira semana da campaña e o 7,3 por cento que o fixo a última da carreira cara ás urnas. Segundo a enquisa do CIS, o 6,5 por cento decantouse por unha formación política o propio domingo electoral.

A decisión primordial pola que os enquisados apoian a unha ou outra forza política baseouse, no 35,2 por cento dos casos, en que a formación elixida é a que mellor defende os intereses de Galiza. De coñecer os resultados finais do 1-M previamente a emitir o sufraxio, o 81 por cento dos cidadáns afirma que faría o mesmo.

Ademais, o 27,2 por cento dos galegos votara o PP nas Xerais de 2008, mentres que o 32,3 por cento apoiara o PSdeG e o 7,9 por cento emitira o seu sufraxio favorábel ao Bloque. Nas galegas de 2005, o 25,9 por cento dos entrevistados declaran que apoiaron o PPdeG, o 25,6 por cento o PSdeG e o 11,1 por cento o BNG.

Para case tres de cada dez galegos os problemas de índole económica centraron a campaña electoral das autonómicas, fronte ao 4,1 por cento que pensa que foi o coche oficial de Touriño, o 3,1 por cento os insultos e descualificacións, o 1,8 por cento a política lingüística e o 1,7 por cento o malgasto.

Dos enquisados, o 34,1 por cento di que o PP ten unha posición máis próxima á súa, mentres que esta mesma resposta outórgana ao 22,4 por cento en relación co PSdeG e ao 8,4 por cento respecto do BNG.

En conxunto, a maioría de galegos tachan de regular a campaña desenvolvida polas tres principais formacións políticas. Pensan así respecto do PP o 34 por cento dos enquisados, en referencia ao PSdeG o 47,2 por cento e no canto ao Bloque o 38,8 por cento dos galegos.

O 93,4 por cento dos galegos segura que non intentou convencer a ninguén de que debería votar por un ou outro partido e o 88,3 por cento di que ninguén tratou de facelo co enquisado. O 8,4 por cento dos galegos dubidou a que forza política dar o seu sufraxio, dos que o 28,8 por cento o fixeron entre o PP e o PSdeG e o 14,2 por cento entre o PSdeG e o BNG.