Carlos Aymerich, portavoz do BNG no Parlamento. AGN O portavoz do Grupo Parlamentar do BNG, Carlos Aymerich, anunciou hoxe que finalmente os nacionalistas recorrerán ao Tribunal Constitucional para defender o dereito do grupo a exercer o seu labor de oposición. E é que malia a boa disposición na reunión que mantivo o portavoz do BNG con Pilar Rojo, presidenta da Cámara, o pasado venres e na xuntanza dos portavoces celebrada hoxe, o PP volveu impedir a inclusión de iniciativas nacionalistas.

Aymerich asegurou que non é casual que este novo veto dos populares coincida co tema da iniciativa que quería incorporar o BNG á orde do día, e que tiña a ver coa situación da empresa Caramelo.

Para o portavoz nacionalista, logo do acontecido no pleno da semana pasada, é “lóxico” que o PP non teña interese en traer á Cámara de novo este debate, de aí que, amparándose na súa interpretación do regulamento, volva silenciar o traballo da oposición, nomeadamente do BNG.

Lingua e AVE

Sobre a orde do día, criticou que finalmente se vaia “perpetrar” a reforma da Lei da Función Pública, que vai consumar a eliminación do galego nas oposicións en base a unha suposta “cortesía”, “cortesía con Madrid”, dixo.

A pregunta ao presidente versará sobre a valoración que fai da reunión con José Luis Rodríguez Zapatero, da que tamén vai dar conta Alberte Núñez Feixóo en comparecencia a petición propia, e que Aymerich considera tivo un resultado absolutamente baleiro de contido. O nacionalista subliña que non hai noticias nin de prazos nin de financiamento sobre o AVE, “salvo que se vai incumprir o acordado por unanimidade no Parlamento; nin hai nada sobre financiamento autonómico, malia o compromiso tamén unánime acadado na Cámara hai unha semana”.

Aymerich advertiu de que no caso do AVE, irse a un escenario máis alá do 2013 ten o risco de quedar fóra do apoio comunitario. Sobre os 29 millóns dos que se congratulou Núñez Feixóo, que veñen a Galiza por ter lingua propia, pediu que non se invistan en “facer enquisas”. Neste sentido, anunciou que levarán ao pleno unha interpelación sobre o decreto do galego no ensino.

Finalmente, tamén preguntarán polos anuncios de privatización da CRTVG, polo papel de Traballo no conflito do metal e polas medidas para erradicar os prexuízos que aínda hai en Galiza sobre a libre orientación sexual das persoas, dada a proximidade do 28 de Xuño, Día do Orgullo Gay.