Sindicatos do ensino protestan contra a Derrogación do Decreto do galego. Manuel Vilas

Todos os sindicatos do ensino, menos o CSIF, volveron atacar hoxe a enquisa coa que Xunta xustificará a derrogación do decreto do Galego. CIG, Comisións Obreiras, UGT, SteG e ANPE reuníronse co PSOE en Santiago para coordinar unha resposta.

Denuncia pola prohibición dos actos

O STEG adianta que vai levar aos xulgados o correo electrónico, sen asinar, no que Educación prohibe actos informativos sobre a polémica enquisa. Xosé Cabido denunciou tamén o “uso partidista de fondos públicos” para defender os postulados “dun grupo minoritario que fixo moito ruído mediático”, en referencia a Galicia Bilingüe.

Cabido destacou que todas os sindicatos comparten uns “presupostos básicos” a favor da actual norma e contra a consulta.

A CIG pide que se responda “todo en galego”

Marta Dacosta, da CIG, chamou a “unir forzas” contra a reforma. A sindicalista lembrou que a enquisa “pode que vulnere” a lexislación de protección de datos. Para ela as preguntas son “enganosas” porque, malia súa redacción, non se pregunta por todas as materias.

En realidade, argumenta Dacosta, cuestionase unicamente sobre as materias nas que se podería cambiar o idioma, que no caso da ESO só son 12 das 32 horas lectivas. En todo caso, Dacosta recomendou responder “todo en galego” nas enquisas.

A representante da CIG tamén atacou a censura dos actos informativos. En particular, o feito de que a circular viñera sen asinar, o que “pon en dúbida a súa legalidade”.

Todos os sindicatos defenden o PNL

Dende Comisións, cualifícase a iniciativa de Educación de “pseudoenquisa” pola súa falta de fiabilidade. Este sindicato, a través de Chus Fernández, argumenta que o Goberno vai derrogar o Decreto vixente sexa cal sexa o resultado. Fernández reclamou volver ao consenso do Plan de Normalización Lingüística (PNL), reivindicación que apoian todas as forzas sindicais que foron hoxe ao Parlamento.

Raúl Gómez, da UGT, critica que a Xunta non teña en conta dos órganos legais de representación da comunidade educativa, en particular o Consello Escolar de Galiza. UGT mostrou o seu “apoio decidido” ao actual texto aprobado polo bipartito. Gómez dixo que, en todo caso, “estamos abertos a un debate sobre un novo decreto sempre que supoña promocionar o galego”.

ANPE pide calma

Por último, Xulío Díaz da ANPE pediulles aos partidos que “rebaixen a crispación” sobre o decreto. Díaz argumenta que nos centros non existía unha polémica relevante sobre a lingua até que Educación a introduciu mediante a enquisa. O sindicalista reclamou “calma” á Xunta e que non se precipite na reforma legal.