Estudantes nunha aula. Paco Vilabarros En rolda de prensa, Gantes citou a mellora dos equipamentos dos colexios, a dotación de profesores de apoio e coidadores para o tramo de educación infantil e a falta de prazas en comedores escolares como as "prioridades" da escola pública. Así, pediulle ao Goberno galego que "deixe en paz" a comunidade educativa "cunha guerra que nunca existiu" e que atribuíu a un intento "de deixar en segundo plano as necesidades reais".

Do mesmo xeito, argumentou que a educación debe ser resultado "do consenso entre todas as forzas políticas" e sostivo que, en todo caso, "debe ser a sociedade en xeral e non só os pais os que opinen". Tamén criticou o propio sistema da enquisa, porque "as familias numerosas poden cubrila tres ou catro veces, segundo o número de fillos, e o que teña un, só unha vez".

Ademais, o responsábel da Confederación Galega de Apas de Centros Públicos preguntouse por que, seguindo "o mesmo" criterio, "non se lle pregunta" á sociedade a súa "opinión" sobre "os impostos ou as peaxes". "É o Parlamento galego ao que lle corresponde lexislar", defendeu.

Para rematar, reprobou que na reunión que mantivo a súa asociación o pasado mes de maio co conselleiro de Educación, Xesús Vázquez, este asegurou que a consulta era "exclusivamente para saber como estaba o ensino en Galiza". Fronte a isto, Gantes sostivo que, en todo caso, debería contarse coa opinión dos consellos escolares.

“Ruptura irresponsábel”

Nos mesmos termos manifestáronse os portavoces de Educación e Lingua do PSdeG no Parlamento Galego, Guillermo Meijón e Francisco Cerviño, respectivamente, cos que os representantes de Confapa-Galicia mantiveron hoxe unha reunión na súa sede da Coruña.

Pola súa banda, Cerviño cualificou a postura do Executivo autonómico sobre o decreto do galego como unha "ruptura irresponsábel" do consenso alcanzado por todos os partidos políticos a través da Lei de Normalización Lingüística.

Do mesmo xeito, Guillermo Meijón cualificou de "fraudulenta" e "facilmente manipulábel" a enquisa da Consellaría de Educación e criticou que se lles consulte aos pais, "pero se deixe á marxe de calquera opinión ao Consello Escolar de Galicia".

"Por que non se consulta polas carencias dos centros?", expuxo Meijón, quen acusou as manifestacións do presidente da Xunta, Alberte Núñez Feixóo, e do conselleiro de Educación sobre o decreto do galego como a "verborrea da confrontación".

"O seu único compromiso é derrogar un decreto, pero non sabemos a día de hoxe o que pretenden", subliñou o deputado socialista, quen cualificou de "lamentábel" que a Consellaría de Educación "para o único que teña diñeiro é para o ensino concertado".