Xavier Guerra, conselleiro de Industria, recibindo un premio pola súa firma téxtil 'El Secreto del Mar'. a3mblog É un bo exemplo o conselleiro de Industria, copropietario dunha empresa téxtil baseada en Vigo pero que produce en Portugal? Alberte Núñez Feixóo evitou responder claramente esta cuestión este xoves na rolda de prensa tras o Consello da Xunta.

Guerra competiu por axudas da que hoxe é a súa consellaría

Iso si, o mandatario defendeu o seu conselleiro, Xavier Guerra, a quen cualificou de “empresario 'intachábel'” e como “un dos mellores profesionais de Galicia”.

Guerra é socio de 'El Secreto del Mar', firma téxtil dirixida dende Vigo pero que di producir en Porto. Esta empresa, famosa pola marca 'El Niño', competiu en 2008 por axudas da Consellaría de Industria, o mesmo departamento que agora dirixe o empresario vigués.

O conselleiro defende a súa firma na Cámara

A Guerra indignáronlle as acusacións da oposición este mércores no Parlamento sobre a súa dupla condición. Socialistas e nacionalistas destacan que, no seu cargo actual, terá que decidir, por exemplo, sobre subvencións a competidores de 'El Secreto del Mar'.

Insinuacións que levaron a Guerra a conseguir unha quenda extra para defender a súa empresa no pleno. BNG e PSdeG responderon abandonando o hemiciclo ante o que entenderon como a explotación par un fin privado do Parlamento.

Feixóo dille a oposición que aprenda a perder

Feixóo vinculou esta protesta, para el unha “arroutada", co éxito do PPdeG nas europeas. “Hai que saber perder”, espetoulle á oposición.
 
O conservador defendeu ademais o dereito de empresarios e profesionais a ser conselleiros. Para Feixóo hai dous tipos de “persoas que se adican a política”. Aqueles que proveñen da función política, como o propio Feixóo, e os que que teñen “outros medios” de gañarse a vida, como Xavier Guerra.