O cabeza de lista do PP, Mayor Oreja, con Raxoi. PP

O escrutinio do cen por cento dos votos confirmou o que xa se foi avanzando ao longo da noite electoral. O Partido Popular gañou os comicios europeos cunha vantaxe de 3,7 puntos respecto ao PSOE. Os conservadores acadaron o 42,2 por cento dos votos, polo que se fan con 23 escanos no hemiciclo do Parlamento comunitario.

Pola súa banda os socialistas, que lograron o 38,5 por cento dos sufraxios, conseguen 21 eurodeputados. En número de votos, a vantaxe de Mayor Oreja sobre López Aguilar é de máis de 580.000, graza sobre todo aos resultados de Madrid e Valencia, onde experimentaron unha suba considerábel. Porén, seguen a descender en Euskadi e non logran despegar en Catalunya.

O PP viviu estes resultados como a consolidación de Mariano Raxoi á fronte do seu partido. Despois da vitoria popular en Galiza o pasado mes de marzo, parece que se despexan as dúbidas sobre unha nova batalla interna a curto prazo.

UpyD, a sorpresa

Pero sen lugar a dúbidas, a sorpresa destes comicios foi UPyD, o partido de Rosa Díez, que acadou un escano, con 449.499 apoios (2,87%), malia ser a súa primeira experiencia comunitaria.

Por riba, quedaron a Coalición por Europa e EU-ICV-EUiA-BA, con dous escanos cada un. A primeira formación, encabezada por CiU, PNV e CC, logrou mellorar os resultados de 2004, cando se presentou como GALEUSCA, e Izquierda Unida, que baixou algo, mantén a representación anterior.

Ana Miranda no hemiciclo

Ademais, Europa dos Pobos-Verdes, na que se integra o BNG, conseguiu un eurodeputado, con 391.962 votos (2,5%). Deste xeito, os nacionalistas galegos poderán volver ao Parlamento comunitario a principios de 2011, grazas ao sistema rotatorio acordado, que levará ao hemiciclo a Ana Miranda.

O outro dato chave da xornada foi o de participación. A pesar dos prognósticos que vaticinaban unha forte suba da abstención, nestes comicios europeos votou o 46 por cento do electorado, unhas décimas por riba do 45,9 por cento do 2004.

Ana Miranda estará no Parlamento Europeo. Jessica Barcala/AGN

Estas son as sextas eleccións europeas que se celebran en España e, nesta ocasión, elixíronse 50 eurodeputados, fronte aos 54 de 2004. Así e todo, cando se aprobe o Tratado de Lisboa o número de representantes comunitarios volverá á cifra anterior.