Así mesmo, anuncia que a Xunta prevé "transformar" e "integrar" as escolas infantís, onde se inclúen as 'galescolas', nun proxecto "ambicioso" que permita un nivel de educación "de calidade" entre 0 e 6 anos.

"Este goberno non vai propoñer un simple cambio de nome, está falando, vaise reunir, ten unha comisión con nomes e apelidos practicamente pechada para deseñar un modelo de escola infantil, que vai máis aló dos nomes e estará adaptado ao currículo infantil" -aprobado no último Consello da Xunta-, sinala.

Deste xeito, as 'galescolas' pasarán "no seu momento" a depender de Educación "do mesmo xeito que o resto de escolas infantís" dentro dun armazón que será unha "única estrutura" para intentar "que dea pé a algo coherente", aínda que admite que a duración do traspaso levará tempo.

En relación ás prazas, asegura que "todo o mundo ten dereito" a elas, pero que a súa dispoñibilidade "dependerá dos recursos" económicos. A pesar diso, promete que estas prazas estarán aseguradas para "aquela xente que non ten recursos".

Sobre a demanda constante dos reitores das universidades para que se acelere o estudo dun novo Plan de Financiamento do sistema universitario -o actual acaba no ano 2010-, Vázquez Abad recoñece que 2009 "é un mal momento para empezar a falar e a pór unha proposta encima da mesa".

"Non é momento de incrementos salariais, nin de pintado de fachadas, e haberá que racionalizar e priorizar", sentenciou para facer un chamamento á "responsabilidade" das universidades sobre o control do gasto.

Por iso, aínda que admite que este ano se podería empezar a falar", aprazou o desenvolvemento do plan galego á aprobación do plan estatal por parte do Ministerio de Educación, "porque vai outorgar unha certa coherencia a todo o sistema" e permitirá sentar a base para redactar o marco financeiro autonómico.

"Algunha solución haberá que pór e esa non pasa porque a consellería volva pór 10, 20 ou 30 millóns por encima do anterior plan, xa que esa situación, se é a única, estamos mal, porque negociar supón que cada parte cede para chegar a un entendemento e o que non poden facer é imporme", critica en alusión ás reclamacións dos reitores das universidades galegas.

No entanto, asegura "entender" que cada reitor "queira máis" para as súas universidade e ironizou con que el tamén quere "a praia en Ourense" -onde naceu- e que "sexa a mellor cidade do mundo". "Eu teño que escoitar ao reitor de Vigo porque ninguén mellor que el coñece a súa universidade e claro que esa opinión é importantísima, pero tamén teño que escoitar á Coruña ou Santiago. Casemos agora este matrimonio", recomenda o titular de Educación, quen subliña que "a quen lle toca gobernar e decidir é á consellaría".

Por iso, sobre unha posíbel "deficiencia" na adaptación ao sistema Bolonia por mor de non dispor dun novo plan de financiamento, avoga por crear unha "oferta atractiva" para "manter alumnos" en Galicia. "Intentamos que se favorecese a todas as universidades e grazas á decisión da consellaría de converter en graos as diplomaturas en Ciencias Empresariais beneficiáronse as catro provincias", exemplifica.

Doutra banda, sobre a posibilidade de convocar as oposicións de Secundaria en 2010, o conselleiro de Educación avanza que "a priori, si", pero que no seu momento "haberá que analizar datos" como son a dispoñibilidade de prazas, e afirma que esta terá que "negociarse na mesa de sindicatos".

Admite que este ano "era un clamor" pospor a convocatoria ante unha situación "con moi poucas prazas", até o punto de que "unha maioría" de xente remitiu queixas ao Executivo galego "pedindo que se aprazasen".

Sobre a orde que deixou asinada o bipartito en funcións que eliminaba os concertos educativos a varios centros por separar o alumnado en función do seu sexo, Vázquez afirma que "está na Asesoría Xurídica" e que, unha vez se pronuncie este organismo, terán "que tomar unha decisión".

"O que si quero deixar claro é que as actuacións da anterior orde non foron correctas" lamenta, ademais de considerar que houbo "irregularidades" no devandito proceso.

Finalmente, sobre a súa postura respecto dos centros que separan o alumnado por sexo, Vázquez Abad considera que se trata "dunha alternativa" en base a "unha legalidade" e lembra que "a Unesco e o Ministerio de Educación" así o determinan. "Os pais teñen liberdade para elixir centros? Si. O sistema permite concertos? Si. Existen tribunais para quen non lle guste esa decisión? Si. É básica a liberdade dos pais", argumenta.