Rosa Aneiros e Xacobe Fernández Serrano. Xerais    1 / 3    

Rosa Aneiros foi a gran protagonista da festa literaria que Xerais celebrou este sábado na illa de San Simón. A xornalista de Valdoviño subiu a recoller dous galardóns: o Premio Xerais de Novela e o Fundación Caixa Galicia de Literatura Xuvenil.

O Xerais de Novela 2009, dotado con 25.000 euros, foi para a súa obra ‘Sol de Inverno’ que, segundo o xurado, “debuxa o periplo vital dunha fascinante personaxe que, dende os trece anos que ten ao comezo do libro, se move baixo o motor da paixón”. A historia fala da crueldade da guerra, do exilio, da revolución castrista e mesmo do maio do 68, pero sobre todo da rebeldía dos seus protagonistas na defensa dos ideais e da xustiza.

Segundo explicou a propia autora, no momento de recibir o galardón, “nesta novela quixen recuperar a memoria da miña propia infancia”. Rosa Aneiros asegura que a protagonista, Inverno, “é un personaxe completo que loita polos seus ideais, máis tamén polos ideais de outros, que sinte tan perto como os propios”.

Os membros do xurado desta XXVI edición consideran que o texto, “de profunda introspección nos protagonistas e no deseño dos ambientes, constrúe un mundo simbólico, máximo, riquísimo en referentes, a través do que pululan seres entrañables, que nos conmoven, e tamén persoas reais, como Castelao, Carme Muñoz ou Rafael Dieste”.

'Ás de bolboreta'

O Premio Fundación Caixa Galicia de Literatura Xuvenil 2009, dotado con 10.000 euros, tamén foi para unha obra de Rosa Aneiros: ‘Ás de bolboreta’. Nesta novela crúzanse historias humanas diferentes que, no seu conxunto, conforman unha radiografía da sociedade urbana actual: globalizada, interconectada e diversa.

Na súa xustificación, o xurado salienta que “tratando temas nada compracentes, como o terrorismo, a intolerancia, a soidade ou a violencia contra as mulleres, a novela flúe e conmove os lectores/as grazas á combinación de diálogos áxiles e frescos con pasaxes fondamente líricas”.

Premio Merlín

O segundo protagonista da xornada foi Xacobe Fernández Serrano que acadou o Premio Merlín de Literatura Infantil 2009 por ‘Mil Cousas poden pasar. Libro I’. O xurado do galardón, dotado con 10.000 euros, valorou o traballo deste autor vigués que, “baixo a premisa da liberdade absoluta, proponlle ao lector un xogo no que calquera cousa pode acontecer”. Nestas páxinas, "o surrealismo é o normal e o absurdo convértese no lóxico".

Construído como unha cadea de dominó, onde unha ficha derruba á seguinte, a historia desborda imaxinación. Ademais, o xurado salienta o novidoso do argumento, a inédita e variada galería de personaxes, a solidez do mundo que se constrúe, a orixinal estrutura, o risco de levar o absurdo ao extremo, a beleza plástica dalgunhas descricións e o metafórico de moitas pasaxes argumentais.