Audiencia Nacional

Foi na súa quenda de última palabra cando García Vidal insistiu ante o tribunal da Sección Primeira da Sala do Penal en que a súa acción non era un atraco senón "unha expropiación" e quixo explicar esta interpretación dicindo que se trataba "dunha recuperación de fondos económicos".

"Consideramos que o diñeiro dese banco pertence ao pobo que traballa, somos os traballadores os que producimos a riqueza e logo esas entidades bancarias a empregan contra ese mesmo pobo. Recuperar o diñeiro para a vida obreira é moi saudábel", sentenciou.

García Vidal comezou a súa declaración manifestando o seu desexo de contestar en galego. "É a miña lingua", argumentou o 'grapo' quen admitiu a súa pertenza á banda desde 1997. "Era integrante dos Grapo e actuaba concretamente na extracción de fondos para a organización", explicou ante o tribunal presidido por Javier Martínez Lázaro.

O testemuño de García Vidal sobre os feitos foi distinto das teses defendidas pola fiscal. A representante do Ministerio Público sostén que ambos os dous terroristas asaltaron o director da sucursal bancaria cando saía da súa casa, apuntáronlle, ameazárono con atacar a súa familia e levárono até o banco.

Con todo, o 'grapo' negou calquera hostilidade contra o director da oficina bancaria, así como terlle apuntado coa pistola ou falado da súa familia. De feito, explicou que tiveron que esperar a que chegase o interventor da sucursal para abrir a caixa forte e narrou que o tempo de espera o empregaron en "falar da prensa" co seu refén.

"Explotación laboral"

Segundo recordou o acusado, o director do banco pediulles que tivesen coidado co interventor xa que tivera un problema cardíaco o día anterior -para o que requiriu a asistencia dunha ambulancia-. Este feito, serviulle ao 'grapo' para denunciar o abuso laboral ao que era sometida a súa vítima. "É unha proba da explotación laboral, un home que o día anterior tivera un simulacro de infarto, ao día seguinte tiña que ir traballar", denunciou.

A partir de aí, García Vidal recordou que levaron o diñeiro do banco, aínda que non recordaba a cantidade exacta. "Iso estará nas contas de Caixa Galicia, os bancos contan ben os seus cuartos", dixo o terrorista, quen contou durante a súa declaración coa asistencia dun tradutor.

Posteriormente, o seu compañeiro Israel Clemente López presentouse ante o tribunal como “membro do comando central dos Grapo desde 2001 e máximo dirixente da banda entre 2002 e 2007". "Reivindico e asumo todas as accións da banda entre eses anos", dixo.

"Vostede tamén vai necesitar tradutor?", preguntoulle o presidente do tribunal. "Non, eu son de León", replicou o terrorista, quen apoiou a versión do seu compañeiro aínda que con algunhas "matizacións". Segundo declarou, o director do banco nunca lles dixo que o seu compañeiro sufrira un infarto e admitiu como “probábeis” as ameazas con atacar a súa familia. "Tratábase dun atraco, hai que facer cousas para que a persoa acceda a facer algo que de forma natural non faría", xustificou.