Na proposta de resolución número 26, o BNG insta ao Goberno a iniciar negociacións co Goberno portugués para subscribir un acordo, “acompañado dos medios técnicos necesarios, que permita a recepción en Galiza e en Portugal das televisións de ambos os dous países”.

Ademais, pide a incorporación do galego e do resto das linguas cooficiais nos órganos xudiciais e na Administración de xustiza, na Administración Xeral do Estado, sobre todo nos Rexistros, e estudar as reformas regulamentaria que permitan a incorporación destas linguas  ás Cortes Xerais. Aquí a emenda do grupo socialista só substituía a denominación de galego, catalán e éuscaro por “linguas oficiais do Estado distintas do castelán”.

Na defensa desta proposta o parlamentar nacionalista lembrou a multitudinaria manifestación do pasado domingo en Santiago en defensa do galego, e acusou aos que “pretenden unha visión uniformista de España de realizar unha campaña de insidias sobre o consenso lingüístico que había na Galiza”. Esta resolución recibiu 196 votos a favor, 151 en contra.

A resolución número 27 atinxe á defensa dos sectores produtivos básicos: o naval e o sector lácteo. Nesta proposta, solicítalle ao Goberno central abrir un proceso negociador no marco da Presidencia española da UE, para que o estaleiro de Fene volva á construción naval civil.

Na cuestión láctea, o BNG asinou conxuntamente co PSOE unha transaccional que empraza ao Executivo a abordar no primeiro semestre de 2010, o Informe do acordo de novembro de 2008 do Chequeo Médico da PAC, “sobre a evolución da situación do mercado do leite e o réxime de cotas lácteas, acompañando de propostas encamiñadas a asegurar a estabilidade e viabilidade futuro do sector e corrixir os desequilibrios”.

A resolución do BNG tamén pide normativas para mellorar a regulación do prezo de referencia do leite. Esta proposta recibiu 347 votos a favor e tan só 1 abstención.

Respecto da resolución número 28 que fala das infraestruturas ferroviarias, Jorquera dixo que “debe haber un compromiso firme co impulso das infraestruturas, cun calendario críbel e compromisos orzamentarios”. O deputado do BNG aceptou unha emenda do grupo socialista que unicamente modifica a data da adaptación da alta velocidade do tramo Ferrol-A Coruña que en lugar do 2012 se aceita que sexa 2013. A resolución recibiu 198 votos a favor, 1 en contra e 149 abstencións.

Os puntos da resolución do AVE

Nesta proposta de resolución, o BNG insta ao Goberno estatal a dotar de todos os medios materiais e económicos precisos para acelerar a execución da conexión coa Meseta “establecendo un calendario fiábel e críbel que garanta o seu remate á maior celeridade”.

En canto ao Eixo Atlántico, pídelle ao Goberno que acelere os trámites en curso e execute as partidas orzamentarias para iniciar as obras no tramo Vigo-fronteira portuguesa e entre Ferrol e A Coruña. “De xeito que a conexión con Porto estea operativa no 2013 e a adaptación á alta velocidade de Ferrrol-A Coruña no 2012”.

Por iso, os nacionalistas reclaman axilización para a execución do proxecto de entrada en Ferrol (Ponte das Cabras-Estación) e que se someta a información pública o estudo do Ferrol-Betanzos, “executando as partidas do presente exercicio”.  

O BNG solicita un “calendario fiábel” para garantir a conexión coa rede ferroviaria dos portos exteriores de Ferrol e A Coruña, “executando as partidas consignadas”.

No canto aos tramos Lugo-Ourense e Monforte-Ponferrada, emprázalle a dotalos dos medios económicos precisos para acelerar a súa execución de xeito que o horizonte temporal non sobrepase o 2015.

Por último, neste capítulo, solicítalle ao Goberno iniciar neste ano un proceso de diálogo bilateral coa Comunidade Autónoma galega para o traspaso de medios materiais para o establecemento de servizos ferroviarios de proximidade na Galiza. Do mesmo xeito, pide un proceso de diálogo bilateral para o seguimento da execución orzamentaria das infraestruturas galegas.