Mariano Raxoi no Congreso. Susana Vera/REUTERS Os datos económicos servíronlle a Raxoi para comezar o seu discurso na quenda de tarde do debate, no que se preguntou como é posíbel que “un país que era a envexa duplique agora en taxa de paro o resto de países da UE”.

"Vostedes non fixeron nada en nada, de nada, de nada, de nada", salientou Raxoi, que cre que a Zapatero lle sobran palabras e fáltanlle feitos. O líder do PP sinalou que o Executivo español "acusaba de antipatriotas aos que dicían que non había crise". Ademais, cualificou a Zapatero de mentireiro, xa que "prometeu dous millóns de empregos" antes das eleccións "e un período de menor crecemento" logo delas.

Tres eixos para un cambio

Raxoi salientou tres eixos de cambio: dicir a verdade, deixar de fantasear e expor un plan realista coas previsións. "Sen un bo diagnóstico non pode haber un bo medicamento" dixo entre os apupos dos deputados socialistas.

O popular cre que as políticas de Zapatero “van arruinar os españois, non van dar resultados e van impedir que se cre o principal substrato da recuperación, que é a confianza".

Ademais apuntou que o Plan E “non é máis que un refrito dos once plans que presentou nun ano". "O seu Goberno é o que máis diñeiro gastou xunto con Arabia Saudita e o que peores resultados cultiva", asegurou o líder do PP.

Reforma das pensións

O líder da oposición tamén lle esixiu a Zapatero que reforme o sistema de pensións, no canto de "dicir que vai reformalo", tras o que criticou a medida exposta por Zapatero para relanzar o mercado da vivenda: "Están dicíndolle á xente que ou compran unha vivenda ou quedan sen deducións", apuntou. Ademais, criticou as súas axudas directas aos automóbiles, xa que "quedan moi curtas".