Guillerme Vázquez. Paco Vilabarros

O primeiro discurso de Guillerme Vázquez como portavoz nacional do BNG pivotou sobre tres conceptos fundamentais. O futuro do Bloque como forza política nacionalista, a crítica ao PP galego e a reivindicación da ideoloxía de esquerdas.

“A partir de agora traballaremos como un único Bloque, con unidade e fraternidade”, así definiu Guillerme Vázquez o seu compromiso como portavoz nacional. “Serei humilde e traballarei como o primeiro militante”.

Vázquez avogou por volver unir todo o nacionalismo, “o político e o social”. O portavoz nacional gabou a presenza do Bloque no goberno da Xunta pero tamén resaltou que houbera erros que habería que corrixir.

Para o novo líder nacionalista, cómpre recuperar o diálogo entre dirixentes e militantes e comprometeuse a “visitar todas as asembleas comarcais”. “Serei un portavoz nacional unido aos militantes; un máis dos miles de afiliados”.

Forza transformadora

No seu discurso, Vázquez fixo un amplo repaso da ideoloxía que quere defender como portavoz nacional. “O BNG é unha forza transformadora da sociedade. Non estamos en política para simplemente reproducir a ideoloxía dominante, que é conservadora e antinacionalista”.

Atacou duramente as políticas neoliberais, ás que culpou da actual crise económica. Reivindicou a liberación “dos pobos”, desde o Sáhara Occidental a Cuba. Foi moi duro coa política laboral actual e reclamou melloras nas condicións dos traballadores.

En resume, Vázquez reivindicou as doutrinas políticas de esquerda dun xeito clásico. Animou a votar polo BNG nas eleccións europeas do 7 de xuño. “É a única opción para conseguir unha UE que nos permita construír barcos civís en Fene”. Vázquez non mencionou a candidata do partido neses comicios, Ana Miranda.

En realidade, o novo portavoz non aludiu persoalmente a ninguén, nin sequera o seu adversario na votación final, Carlos Aymerich. Pero este estilo tivo dúas excepcións: Alberte Núñez Feixóo e José María Aznar.

A crítica ao novo goberno da Xunta foi un dos cernes do seu discurso. Advertiu de que haberá unha profunda oposición ás políticas “populares”, con especial destaque á lingua. “Non saben o que queren, só o que non queren. Non queren que os nosos nenos e nenas aprendan galego”. Queixouse tamén de que algúns dos conselleiros do novo Goberno non empregasen o galego nas súas alocucións. “Nin sequera fan un esforzo por usalo dun xeito ritual”.

A carón do ataque ao PP, Vázquez quixo animar os seus militantes e acirrounos a loitar por recuperar o poder. “O PP é derrotábel. Sabémolo e loitaremos por conseguilo”.