Granado sinalou que para que sexa sostíbel se ten que conseguir aumentar a taxa de ocupación para ampliar a base de cotizantes. Entre as vías apuntadas para lograr este obxectivo, destacou a dos fluxos migratorios, así como fomentar unha maior presenza da muller no mercado laboral.

Do mesmo xeito, defendeu a necesidade de incorporar como cotizantes os colectivos "máis precoces", como os bolseiros. Ademais, indicou que tamén se debe lograr que a idade de xubilación "non se desprace cara abaixo". "Ese é un dos obxectivos estratéxicos do sistema español de Seguridade Social", agregou.

O secretario de Estado de Seguridade Social afirmou tamén que en España a idade media real de xubilación sitúase en 63 anos e 10 meses e sinalou que o Pacto de Toledo fixa como obxectivo chegar a unha idade media de xubilación de 65 anos.

Para iso, segundo indicou, habería que prolongar voluntariamente a idade de xubilación e reducir "en termos moderados" a apelación á xubilación anticipada. Tamén defendeu "cambiar as formas de traballo", de xeito que se facilite dos 60 aos 65 anos "traballar menos" e con traballos "menos penosos".

"Se non optamos por manexar a variábel da idade de xubilación, entón deberemos optar por manexar a variábel da contía da pensión. Se non axustamos o tempo de duración da prestación, axustaremos o prezo", sinalou.

Granado insistiu en que, en caso contrario, haberá que apuntarse a ser un dos sistemas de pensións, como pasa nos EEUU ou Rusia, nos que se xubila moi pronto á xente, pero “con pensións moi baixas". Así, manifestou que hai que intentar evitar que a Seguridade Social pague a "factura das situacións de crises soportando na mochila pensional problemas doutra natureza". Ao seu xuízo, os posíbeis "desequilibrios" hai que resolvelos cun "mix de actuacións" en materia de ingresos e de gastos e tamén pedindo a "implicación dos empleadores".

O secretario de Estado pensa que haberá déficit na administración da Seguridade Social do 2030 ao 2050 “porque se van xubilar os que naceron nos anos 50 e 60 e os que seguen detrás son moitos menos". "O Estado, cando acabemos co Fondo de Reserva, terá que achegar diñeiro", indico Granado, quen engadiu que, cando se supere esa "sima", o sistema ten que "manterse en equilibrio".

En relación ao proxecto de crear unha Axencia Única da Seguridade Social, afirmou que ve posíbel o acordo con PP e IU, mentres que os partidos nacionalistas "probabelmente non estean de acordo".